KAPIN sa 3 ka libo ka wanted persons ang nadakpan sa kapulisan sa Central Visayas sulod sa unom ka buwan nga operasyon gikan sa Enero hangtod Hunyo 2025.
Sa data nga gipahibalo sa Police Regional Office (PRO) 7 nakadakop ang kapulisan og 3,199 ka tawo nga dunay
mga pending warrant of arrest sa nagkalainlaing kaso sa korte.
Sa maong gidaghanon, 502 niini giila nga mga most wanted person sa nagkalainlaing level, 304 ang regional ug provincial level, 54 ang city level, 137 ang municipal, ug pito ang station level.
Tungod niini si Police Brigadier General Redrico Maranan, ang hepe sa PRO 7, nagkanayon nga ang maong gidaghanon sa ilang nadakpan resulta sa epektibo nila nga manhunt operations.
“These arrests reflect our commitment to justice and our relentless drive to protect the people of Central Visayas. This is a direct response to the directive of our Chief PNP, PGEN Nicolas D Torre III, to pursue and apprehend all fugitives from the law,” matud ni Maranan.
Magpadayon pa ang ilang paghingusog sa pagpangita niadtong mga personalidad nga dunay pending warrant of arrest ug dili sila mohunong hangtod nga dili sila madakpan.
Base sa impormasyon sa PRO 7, aduna pay libuan ka mga wanted person nga padayon pa nga gipangita diin ang mga akusado pabilin pang gawasnon hangtod karon.
Sa data sa Philippine National Police, maobot pa sa 200,000 ka mga wanted person nga wala pa madakpi sa kapulisan tibuok Pilipinas. / AYB