Kapin P1.5M danyos sa sunog

Cebu City map.
Cebu City map.

Sulod sa 24 oras, tulo ka su­nog ang niigo sa dakbayan sa Sugbo.

Nasunog ang usa ka estabilismento sa ikatulong andana sa Ayala Center Cebu, Bara­ngay Luz, alas 8:53 sa buntag, Mayo 12, 2024.

Alas 9:01 sa buntag niabot ang mga bombero apan da­ling gideklarar nga fire out human nakatubag usab da­yon ang fire responders sa mall.

Wala kini nakaapekto sa ubang estabilisemento apan nagbilin og danyos nga gibanabana nga P1,200,000.

Si SFO1 Riza V Julve, fire investigator sa Cebu City Fire Office (CCFO), nihulagway nga partially burned ang establisemento.

Atol ning pagsuwat, gihimo pa ang imbestigasyon sa kabomberohan bahin sa sunog.

ERMITA

Alas 5:41 sa hapon niadtong Sabado, Mayo 11, 2024, ang kabomberohan niresponde sa sunog nga niigo sa Unit 3 Carbon Market sa dan F. Gonzalez, Barangay Ermita.

Nasunog ang usa ka edipi­syo nga gipanag-iya ni Shawn Dy nga giokupahan sa nag-abang nga si Rosita Baring ug uban pa.

Ang sunog gipasaka sa 1st alarm sa alas 5:46 sa hapon, fire under control sa alas 6:30 sa gabii ug gideklarar nga fire out pagka alas 6:38 sa gabii.

Kini nagbilin og danyos nga gibanabanang moabot og P300,000.

Ang sunog nakaapekto sa duha ka establisemento diin usa hingpit nga nasunog ug usa ang partially burned nga duha ka pamilya ang naapektohan ug unom ka mga indibiduwal, sumala ni Julve, diin wala hingpit nasubay ang hinungdan sa sunog.

MABOLO

Samtang sa dan Tres Bor­ces Padres, Barangay Mabolo, ning siyudad, usa ka balay ang nasunog sab, alas 6:26 sa gabii, Mayo 11, 2024.

Ang balay gipanag-iya ni Asuncion Salomon nga gipuy-an ni Ma. Ivy Aguilar ug uban pa nga nag-abang. Gipasaka sa 1st alarm ang maong sunog ug nakontrolar sa alas 6:30 sa gabii ug fire out pagka alas 6:34 sa gabii.

Kini nagbilin og danyos nga P72,000 ug nakaapekto sa walo ka mga indibiduwal, sumala ni FO1 Michael John Nable sa CCFO nga nagsusi sa hinungdan sa maong sunog. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph