Kapin sa P4 milyunes nga illegal nga drugas ang nasakmit ug upat ka mga tawo ang nasikop atol sa managlahing anti-illegal drug operations sa Metro Cebu sa Martes, Abril 2, 2024.
Unang nasikop sa alas 6:51 sa gabii sa Sitio San Rafael, Barangay Tangke, dakbayan sa Talisay, ang usa ka 17-anyos nga high-value individual (HVI) gikan sa Sitio Mansanitas, Barangay Duljo-Fatima, dakbayan sa Sugbo, kansang ngan gipugngan tungod kay menor de edad, ug ang iyang kauban nga si Cheryl Villena Empinado, 42, taga Barangay Ermita, dakbayan sa Sugbo.
Ang Drug Enforcement Unit (DEU) sa Talisay City Police Station ug Philippine Drug Enforcement Agency (PDEA) 7 maoy nihimo sa buy-bust hinungdan sa ilang pagkasikop ug nasakmit ang mokabat 150 gramos sa gituohang shabu nga adunay standard nga presyo sa drugas nga P1,020,000.
Sa pagka alas 10:45 sa gabii, ang buy-bust sa DEU sa Minglanilla Police Station, pinangulohan ni Lieutenant Christian Bongay, ug PDEA 7 niresulta sa pagkasikop sa 48-anyos nga si Selfred Silva alyas Ondo, security guard nga taga Purok Magbanwa, Barangay Pulpogan, lungsod sa Consolacion, ug ang iyang kauban nga si Elmer Bucog, 47, construction worker nga taga Purok Campo Drive, Barangay Inayawan, dakbayan sa Sugbo.
Nakuha gikan kanila ang gituohang shabu nga motimbang og 501 gramos ug mobalor og P3,406,800.
Sa pakighinabi sa Superbalita Cebu, ang hepe sa Minglanilla Police Station nga si Police Captain Kalvin Jomari Golitod, namahayag nga ang raiding team nakigtransaksyon kang Silva aron mopalit og illegal nga butang gikan kaniya nga mobalor og P2,000.
Human ihatag sa poseur-buyer ang kuwarta ngadto sa mga suspek bugti sa drugas, gisikop dayon kini sa mga polis ug gikuha gikan kang Silva ang laing tulo ka medium-sized ug lima ka dagkong pakete sa shabu nga gibutang sa iyang bag.
Nakuha usab gikan kang Bucog ang usa ka gamay nga pitaka nga adunay sulod nga tulo ka medium-sized nga shabu.
Si Golitod niingon nga si Silva natanggong usab sa Cebu Provincial Detention and Rehabilitation Center (CPDRC) niadtong 2011 tungod sa paghupot og illegal nga mga drugas, apan gibuhian siya niadtong 2019 isip kabahin sa plea agreement.
Hinuon, gipadayon niya ang iyang mga kalihokan sa gidili nga droga, ug ang iyang kontak sa droga mao ang kanhi piniriso sa CPDRC nga ginganla’g “Lexel”, kinsa gibalhin na sa New Bilibid Prison sa Muntinlupa City. / DVG, GPL