Kapin sa 1,000 ka mga balikbayan ug bisita ang niabot sa Sugbo niadtong Huwebes sa buntag, Enero 16, 2025 aron moapil sa kasaulogan sa ika-460 nga Fiesta Señor.
Samtang, ang Department of Tourism (DOT) nakakita og positibong epekto sa pagdugang sa pag-abot sa mga turista sa panahon sa Sinulog.
Nalakip kanila ang 50 anyos nga si Raymund Deligero nga nibalik sa Sugbo human sa halos 20 ka tuig aron ipadayag ang iyang pagpasalamat sa Santo Niño.
Gitug-anan ni Deligero ang mga tigbalita niadtong Huwebes nga ang iyang walay hunong nga mga pag-ampo sa Balaang Bata maoy nakaayo kaniya gikan sa iyang pakigbisog sa sakit nga kanser.
Iyang gisaysay nga nakasinati siya og milagro sa pagkaayo sa iyang colon cancer human nag-ampo sa siyam ka adlaw nga novena ug misa sa Santo Niño.
Naayo siya sa kanser niadtong 2001.
Ang balikbayan gikan sa California, USA niingon nga mobisita siya sa Basilica Minore del Santo Niño ug mag-enjoy sa mga kalihukan sa selebrasyon.
Samtang si Chris Maynard, usa ka langyaw gikan sa Washington nibisita sa Sugbo sa unang higayon, nipaambit nga nakasinati siya og mainit nga pag-abiabi sa iyang pag-abot sa Mactan-Cebu International Airport (MCIA) niadtong Huwebes.
“This is amazing and totally unexpected. It reminds me of a great experience that I had when I went and visited Hawaii many years ago. I felt very welcomed,” nagkanayon si Maynard.
Nanghinaot si Maynard nga sa iyang pag-estar dinhi, iyang masinati ang maayong panahon, mahigalaon nga mga tawo, maayong pagkaon, maayong musika, ug ang oportunidad nga mag-explore sa tanan nga gitanyag sa Sugbo uban sa tinguha nga mobalik pa siya sa umaabot.
Subay niini, si DOT 7 Director Judy dela Cruz Gabato nagkanayon nga ang turismo sa Sugbo sa panahon sa Sinulog festival mosaka gyud ang mga occupancy rate sa mga hotel gikan sa 80 hangtod sa 100 porsyento.
Gitumbok ni Gabato nga ang Balik Cebu program usa ka mahinungdanon nga bahin sa tradisyon sa kultura sa Sugbo nga nag-abiabi og maayo sa mga turista ug Overseas Filipino Workers bisan pinaagi sa paghatag og mga kuwintas o uban pang mga token.
Sumala sa MCIA, sa kinatibuk-ang "Balik Cebu" nga gidaghanon sa mga pasahero nga niabot og 1,027. / DPC