Kapin sa 20 ka mga motorista ang nadakpan ug gipang-isyuhan og temporary operators permit (TOP) ug ang uban gipang-impound sa mga sakop sa Highway Patrol Group (HPG) 7 atol sa gilusad nga checkpoint sa Red Cliff sa Transcentral Highway (TCH) nga gisugdan sa Biyernes sa gabii ngadto sa Sabado, Oktubre 18 ug 19, 2024.
Gilusad ang maong operasyon human sa sunodsunod na nga disgrasya sa TCH mugna sa pagpakusog sa pagpadagan ug banking sa mga motorsiklo.
Matod ni P/Lt. Col. Wilbert Parilla, regional chief sa HPG 7, nga kasagaran sa mga violation sa mga motorista mao ang expired na ang ilang mga rehistro, walay lisensya diin gipang-impound nila kini.
Samtang ang uban nakalapas sa Presidential Decree 96 diin ang ilang mga motorsiklo dunay gibutang nga suga nga hugot nga gidili sa balaod.
Uban sa HPG-7 ang mga sakop sa Road Management Authority-RMA, Business Permit Licensing Office (BPLO), Prevention Restoration Order Beautification Enhancement (Probe) team ug ang Cebu City Mobile Force Company sa Cebu City Police Office (CCPO).
Giangkon ni Parilla nga atol sa ilang pagsaka sa TCH sama sa nakabantay ang mga rider gumikan kay wala na silay naabtan nga mga motorista nga nag-estambay sa Red Cliff nga maoy sikat nga tapukanan sa dunay mga motorsiklo.
Diha matod pa kini magtapok ug mag-inom og ilimnon nga makahubog nga peligro nga makasugat og disgrasya sa karsada kon mag-drive nga hubog.
"Nag-expect ta nga naay mag-inom didto (Red Cliff) pero nakabantay man," matod ni Parilla.
Tumong nganong gidala ni Parilla ang ubang department sa Cebu City Hall sa TCH aron ma-demolish kadtong mga illegal nga estraktura nga gibutang sa kilid sa karsada nga gihimong tindahan.
Samtang gipang-isyuhan usab sa show cause order sa BPLO ang mga tindahan sa TCH ug gipa-report sa Cebu City Hall labot sa kalapasan nga ilang nakita didto.
Nakadawat og daghang pagdayeg sa publiko ang HPG-7 sa dihang ila kining unang gipahibawo apan dunay nagtuo nga mobalhin lang og laing lugar ang mga motorista.
Gidugang ni Parilla nga ila na kining permihon. Gani, dili lang ang habig sa dakbayan sa Sugbo ang ilang estriktohon kon dili ang tibuok stretch sa Transcentral Highway paingun sa lungsod sa Balamban.
Gani, makigtagbo si Parilla sa mayor sa lungsod sa Balamban aron i-regulate ang mga naninda sa bukid ilabi na niadtong mga tindahan nga walay parking area.
Tinguha nila nga mahatagan og proteksyon ang mga motorista nga mangagi sa maong karsada nga luwas sa disgrasya. / AYB