Moabot sa kapin 3,000 ka mga tawo ang nadakpan sa kapulisan sa Central Visayas (CV) atol sa duha ka mga adlaw nga anti-criminality operations gikan sa Agusto 30 hangtod sa Septiyembre 1, 2024.
Ang labing daghan niini nakalapas sa mga lokal nga ordinansa sa matag lungsod ug siyudad nga moabot sa 2,880 diin nakakolekta ang gobiyerno og P1.3 milyunes isip multa.
Sa kampanya batok sa illegal nga drugas, nakasakmit ang Police Regionnal Office (PRO) 7 og 604.83 gramos sa gituohang shabu nga dunay standard drug price nga P4.1 milyunes nga niresulta sa pagkasikop sa 92 ka drug personalities.
Wala magpaulahi ang ilang paghingusog sa pagpangita sa mga tawo nga dunay mga pending warrant of arrest diin nakasikop sila’g 76 diin ang unom niini giila nga most wanted persons nga dunay nagkalain-laing mga kaso nga giatubang sa korte.
Nakaimbargo usab sila og 50 ka mga armas nga walay mga lisensya samtang lima ang nangadakpan nga gikiha na sa korte.
Sa ilang paghingusog sa kampanya batok illegal nga sugal, ang PRO 7 nakadakop og 85 ka mga sugarol atol sa 57 ka operations.
Gimando nang daan ni Police Brigadier General Anthony Aberin, hepe sa kapulisan sa Central Visayas, nga samtang naa pay mabantayan nga mamaligya ug mogamit sa illegal nga drugas, ang kapulisan dili molugak sa paggukod sa maong mga personalidad. / AYB