Kapin sa 400 ka wanted person ang nasikop sa kapulisan sa Central Visayas (PRO 7) sulod sa Hulyo 2025.
Kini kabahin sa subsob nga kampanya batok sa mga gipangita sa balaod nga dunay pending warrant of arrest.
Sa kinatibuk-an nga 434 ka indibidwal nga nasikop, 102 niini giila nga most wanted samtang ang 332 dunay ordinaryong kaso.
Kini nga mga nadakpan nag-atubang og dagkong kaso sa nagkalainlaing lugar sa rehiyon.
Gikan sa maong gidaghanon, 36 sa mga most wanted ang anaa sa regional level, 38 sa provincial, 8 sa city, ug 20 sa municipal level.
Sa laing bahin, bisan og nakasikop ang Cebu City Police Office og 19 ka wanted person, giangkon ni Police Lieutenant Colonel Maria Theresa Macatangay nga duna pa silay hagit tungod kay daghan sa mga wanted ang wala na sa ilang pinuy-anan.
Hinuon, iyang gipasabot nga bisan asa pa man moadto ang usa ka akusado, mamahimo gihapon siyang madakpan tungod kay ang ilang warrant mahimong makuha online.
Adunay kapin sa 1,000 ka warrant of arrest nga gipangita pa sa mga kapulisan sa Dakbayan sa Sugbo. / AYB
