Kapin sa 4,000 ka mga trabaho ang giandam alang sa 2025 Labor Day Job Fair nga gitakda sa Huwebes, Mayo 1, 2025, sumala sa Department of Labor and Employment sa Central Visayas (Dole).
Gipahibalo ni Dole 7 Director Roy Buenafe ang umaabot nga kalihokan sa wala pa ang pagsaulog sa Labor Day atol sa panagtapok sa rehiyon alang sa World Day for Safety and Health at Work 2025 ug sa general assembly sa Central Visayas Association of Government Information Officers nga gipahigayon sa usa ka hotel sa dakbayan sa Sugbo niadtong Biyernes, Abril 25, 2025.
“So far, dunay tay 43-ka local employers and more than 4,600 job vacancies,” matod ni Buenafe.
Ang major job fair ipahigayon sa SM Seaside City Cebu karong Huwebes, Mayo 1, alas 9 sa buntag hangtod alas 5 sa hapon, sa pagsaulog sa 123rd Labor Day.
Kapin sa 40 ka employers ang gipaabot nga mosalmot sa maong job fair, matod ni Buenafe, diin kapin sa 4,000 ka mga bakanteng trabaho ang napirmahan na. Samtang, sa wala pa ang job fair, kapin sa 1,600 ka mga indibidwal ang naka-pre-register na.
Ang pre-registration makatabang sa mga nangita og trabaho nga mailhan ang mga amo sa una kaysa magpila sa taas nga linya aron makadaginot sa oras.
Matod ni Buenafe, ang in-dustriya sa Business Process Outsourcing (BPO) ang dunay labing taas nga gi-aghanon sa local job openings, gisundan sa retail ug service sectors.
Alang sa trabaho sa gawas sa nasud, ang mga posisyon sa pag-atiman usa sa labing gipangayo, gisundan sa industriya sa pagkamaabiabihon.
Alang sa Bohol overseas job fair, ang Department of Migrant Workers Central Visayas nakadawat og kompirmasyon gikan sa duha ka participating private recruitment agencies (PRA).
Lima ka PRAs ang nagkumpirma sa ilang partisipasyon sa Negros Oriental uban sa mga nasud nga nanginahanglan ug mga trabahante gikan sa nagkalain-laing sektor lakip na; Japan, USA, Saudi Arabia, Croatia, Germany, Antigua, British Virgin Island, Guam, Macau, ug Taiwan. Wala pa gipagawas sa DMW 7 Public Information Officer Luche Taniza ang kumpirmasyon alang sa Sugbo. / CDF