NABIKTIMA sa 'wedding scam’ ang kapin sa 50 ka paresan nga hapit na ang gitakda nga kasal nga giandam sa Joshua Events and Party Services, usa ka coordination firm nga nakabase sa Cebu.
Gikataho nga moabot sa P11 milyon ang giingong nasakiyo.
Usa sa mga biktima nga ni-message sa SunStar Cebu niadtong Huwebes, Hunyo 26 ug nihangyo nga dili magpaila, niingon nga ang firm nga gipanag-iya nila ni Rabbie Arnejo ug Kevin Niño Amistad, gibaha og daghang reklamo.
Giingong napakyas kini sa paghatod sa serbisyo sa kasal bisan pa man sa pagkolekta og dagkong bayad gikan sa mga kliyente.
Nahibaw-an sa biktima ang coordination firm pinaagi sa iyang igsuon nga klasmeyt sa usa sa mga tag-iya.
Ang biktima nakadeposito og kinatibuk-ang P80,000 sa firm.
Ang firm nakakuha usab og positibo nga mga review online, nga maoy rason nga nisalig siya ug daghan pang magtiayon ug nagpa-book sa ilang serbisyo.
“Nagpasalig sila nga hatagan mi og kalidad nga kasal, apil ang booking sa hotel ug uban pang suppliers. Pero wala gyud mi nadawat nga serbisyo. Bisan ang reception venue sa uban, pencil booking ra diay,” matod sa tinubdan.
Gisaysay sa biktima nga nagsugod ang mga pagduda dihang ang ubang mga gikasal ug suppliers nagsugod sa pag-post og mga reklamo online mahitungod sa wala mabayari ang mga bayranan ug di maayo nga pagdumala sa mga event.
Nigrabe ang sitwasyon dihang ang kompanya nag-post og bankruptcy announcement sa ilang Facebook page, apan gi-delete ra usab dayon.
Sukad niadto, ang mga tag-iya giingong wa na igkita ug igdungog.
Pipila ka mga biktima ang nakasumbong na sa Labangon Police Station, samtang ang uban nagsumite og pormal nga reklamo sa Lapu-Lapu City Hall ug sa Department of Trade and Industry.
Usa ka grupo sa mga apektadong kliyente ang nag-usa aron magpasaka og kasong estafa sa National Bureau of Investigation (NBI).
Sa pagkakaron, walay mga update nga na-report bahin sa status sa mga reklamo nga gipasaka.
Hinuon, ang mga biktima nanawagan alang sa dinaliang legal nga aksyon, refund, ug mas hugot nga regulasyon aron mapugngan ang susamang mga insidente.
Ang partial nga listahan sa gikataho nga nawala nga kantidad sa mga biktima , dunay gikan sa P40,000 ngadto sa P435,000 matag kaslunon. /CDF