Nasikop sa kapulisan sa Police Station 1 sa Mandaue City Police Station (MCPO) ang giilang high value individual (HVI) sa buy-bust sa Sityo Abra, Brgy. Alang-Alang, alas 10:50 sa gabii sa Miyerkules, Marso 20, 2024.
Ang suspek giilang si Rhandel Cardenas Rizon, alyas Anden, 36, ulitawo, way trabaho, lumolupyo sa nahisgutang dapit.
Nakuhaan kini og 100 gramos sa gidudahang shabu nga may standard drug price nga P680,000.
Sa follow up sa Superbalita Cebu, nasuta nga ang mga sakop sa Drugs Enforcement Unit Intelligence Police sa Mandaue City Police Station 1 nakadawat og impormasyon sa ilegal nga kalihukan sa suspek.
Ang kapulisan naniid ug na-validate ang maong taho hinungdan nga gilusad ang buy-bust ubos sa koordinasyon sa Philippine Drug Enforcement Agency (PDEA 7).
Ang MCPO ubos karon sa bag-ong hepe nga si Police Col. Julius Sagandoy, kinsa nisaad sa pagpadayon sa kampanya bato sa druga. / DVG