Kapin sa P8 milyunes nga balor sa shabu ang nasakmit sa managlahing dapit sa lalalawigan sa Sugbo niadtong Sabado de Gloria sa hapon, Marso 30, 2024.
Usa ka Bryan Torrefranca Bolante, alyas Bayan, 20, ulitawo apan dunay kapuyo, construction worker taga Brgy. Toong, siyudad sa Sugbo, nasikop sa buy-bust sa Sityo Lawis, Brgy. Pusok, siyudad sa Lapu-Lapu, alas 4:19 sa hapon sa naasoy nga adlaw.
Giila siya sa kapulisan nga high value individual (HVI), nakihaan og gibana-banang 1,100 gramos kun usa ka kilo nga gituhang shabu nga may standard drug price nga P7,480,000.
Ang hiniusang pwersa sa City Intelligence Unit ug sa City Drugs Enforcement Unit sa Lapu-Lapu City Police Office (LCPO) ubos sa koordinasyon sa Philippine Drug Enforcement Agency (PDEA 7) ang ningpahigayon sa operasyon dihang nakompirmar sa ilang validation ang kalihukan sa suspek.
Usa ka dako'ng pakite sa gituohang shabu gipalit sa ahente sa kapulisan bugti sa P50,000 nga bogos money. Sa dihang nadakpan ang suspek, nakuhaan pa siya og usa ka knapsack nga may sulod nga upat ka dagkong pakite sa gidudahang shabu.
Sa laing bahin, nasikop si Ronel Reyes Doverte, 40, ulitawo apan may kapuyo , way trabaho, taga Sityo Sawsawan, Brgy. San Roque, siyudad sa Talisay, alas 4:48 sa hapon.
Ang suspek nasakmitan og 85 gramos sa gidudahang shabu nga dunay standard drug price nga P578,000.
Ang mga sakop sa Talisay Police Drugs Enforcement Unit Intelligence nga nakakuha og impormasyon sa pagpamaligya og shabu sa suspek, ila kining gi-validate.
Sa dihang positibo kini, gi-buy-bust sa kapulisan ubos sa kamandoan sa ilang hepe nga si Police Lt. Col. Wayne Magbanua pinaagi sa koordinasyon sa PDEA7.
Nakuha nga ebidensya mao ang usa ka pakite sa shabu nga maoy gipalit sa polis nga nag-undercover gikan sa suspek gamit ang P10,000 nga marked money.
Sa dihang nadakpan, ang suspek nasakmitan pa og dugang pito ka pakite sa gidudahang shabu. / DVG