Gikatakdang hulipan ang bag-ohay lang namatay nga si reelectionist Mandaue City Councilor Editha Cabahug sa Team Mandaue sa iyang anak nga si Looc Barangay Captain Raul Kevin Cabahug.
Ang konsehal namatay tungod sa ovarian cancer samtang nagtinguha og laing termino sa umaabot eleksyon karong Mayo 12, 2025.
Si kanhi Mandaue City Mayor Jonas Cortes nikumpirmar nga pormal nga mohangyo ang partido sa Commission on Elections (Comelec) alang sa substitution.
"We will coordinate with the local Comelec officer for the process,” matod ni Cortes.
Nidugang si Cortes nga kining maong kalambuan dili makaapekto sa partido.
Dugang niya nga giandam na ang mga gikinahanglang rekisitos, lakip na ang panumpa sa katungdanan isip sakop sa One Cebu, death certificate ug Certificate of Candidacy (COC).
Gitug-an sab ni Cortes nga gipahibalo na si Cebu Governor Gwendolyn Garcia kabahin sa substitution.
Iyang giklaro nga si Raul Kevin dili kinahanglan nga mo-resign sa iyang katungdanan karon isip barangay kapitan sa Looc, ug gikinahanglan lang siyaa kon modaog siya sa piniliay.
Bisan pa man nga napatik na ang pangalan ni Konsehal Editha Cabahug sa mga opisyal nga balota, si Cortes nipasalig sa mga dumadapig nga ang mga boto nga para ni Editha ihatag gihapon sa iyang puli, subay sa lagda sa Comelec.
Si Raul Kevin nagserbisyo kaniadto gikan sa 2016 hangtod 2019 ug 24 ka tuig na sa serbisyo publiko.
Nahimo siyang SK chairman, SK federation vice president, barangay councilor sulod sa siyam ka tuig, presidente sa Barangay Council for the Leadership and Protection, city councilor, ug kanhi chairman ug kasamtangan’g vice chairman sa Mandaue City Police Advisory Council.
Si Comelec Region 7 Director Francisco Pobe miingon nga gitugotan ang substitution sa mga kaso nga mamatay ang usa ka kandidato basta ang mopuli gikan sa samang partido sa politika ug parehas og apelyido.
“This is permissible under election rules, but it must be officially declared by the party,” matod ni Pobe.
Ang proseso sa substitution mahimong mahuman bisan kanus-a sa dili pa ang udto sa adlaw sa eleksyon. / CAV