Nagtinguha ang Kagamhanan sa Probinsya sa Sugbo nga mo-apply sa Department of Energy (DOE) aron mangayo og pagtugot nga mo-take over isip power generator sa isla sa Malapascua, lungsod sa Daanbantayan.
Kini human nga gi terminate na sa Cebu II Electric Cooperative, Inc. (Cebeco II) ang kontrata niini sa PowerSource Philippines, Inc. (PSPI) tungod sa kakuwangon sa supply sa kuryente sa lungsod.
Gusto sa kagamhanan nga mahatagan og insakto’ng supply sa kuryente ang lungsod nga una nang gihimug-atan sa Kapitolyo nga usa sa mga world class tourism destination sa probinsya.
Ang termination sa kontrata sa PSPI nagsugod human wala mahatag niini ang angay nga service standards nga gi-require ubos sa una nilang nasabutan. Sukad sa 2009, nahimo’ng qualified third party ang PSI paghatag og kuryente sa Malapascua.
Ang Cebebo II maoy exclusive franchise holder sa isla nga mao usab ang naghatag og serbisyo sa ikaupat ug ika-limang distrito sa Sugbo.
Samtang ang Cebeco II nga exclusive nga franchise holder sa isla, lakip ang ubang lokalidad, ni-waive sa ilang katungod nga mohatag og serbisyo sa Malapascua pabor sa PSPI gumikan sa remote ug lisod ma-access nga lugar.
Matod ni Cebeco II General Manager Engr. Lowell Belciña nga ang dispute notice gumikan sa wala matagbo nga 220-kilowatt load requirement sa isla sukad sa 2019 hinungdan sa sunodsunod nga complaint ang ilang nadawat.
Niadtong Mayo, ang Kapitolyo nihatod sa upat ka mga sets sa 500 KVA generators aron masuplay ang 2-megawatt nga kuwang sa isla. / ANV