Di ibalhin ang Cebu Provincial Capitol gikan sa Cebu City ngadto sa lungsod sa Balamban.
Kini maoy baruganan sa kagamhanan sa lalawigan labot sa plano nga ibalhin ang Kapitolyo .
Si Cebu Capitol Public Information Officer Ruben Licera niingon sa usa ka message interview niadtong Huwebes, Hulyo 10, 2026 nga gimando ni Gobernador Pamela Baricuatro ang usa ka technical review sa dapit sa Barangay Cambuhawe, Balamban, nga kaniadto gikonsiderar alang sa pagbalhin sa Kapitolyo.
“There will be no transfer of the Capitol. Governor Pam has ordered a technical review-land papers, DPWH road records, and environmental status-to decide the best community use for that area,” matod ni Licera.
Gipasabot ni Licera nga ang review maglakip sa pag-verify sa mga dokumento sa yuta, mga rekord sa access sa karsada sa Department of Public Works and Highways (DPWH), ug usa ka environmental assessment aron mahibaw-an ang labing maayo nga posibleng paggamit sa luna.
Dugang pa ni Licera nga ang pasiunang direksyon ni Baricuatro mao ang pagpalig-on sa mga satellite offices aron mas paspas nga maabot ang mga serbisyo sa mga konstituwente.
Ang Kapitolyo mopagawas sa tibuok detalye sa review sa higayon nga kini matapos na.
Sayo niini, gipadayag ni Baricuatro ang pagsupak sa plano sa miaging administrasyon nga ibalhin ang Kapitolyo sa Balamban.
Ang gisugyot nga balhinan, usa ka bungtod sa Cambuhawe, nga nagkinahanglan og daghang imprastraktura.
Sa usa ka report gikan sa SunStar Cebu kaniadtong Oktubre 7, 2023, ang 2.3-ektarya nga luna kabahin sa pasiunang 17.5 ka ektarya nga nakuha sa Kapitolyo, uban sa mga plano pagkuha og dugang 50 ka ektarya.
Ang pagpalambo sa dapit gipundohan pinaagi sa P200 milyones gikan sa DPWH, uban sa P500 milyones gikan sa budget sa Probinsya sa Sugbo. / CDF