Mopalit og libuan ka mga bakuna batok sa rabies ang Kapitolyo aron masolusyonan ang nagkataas nga kaso sa mga napaakan sa hayop sa probinsya.
Si Cebu Governor Pamela Baricuatro niadtong Biyernes, Agusto 8, 2025, nipahibaw nga mopalit ang Kapitolyo og 10,000 vials sa anti-rabies shots subay sa hangyo sa mga hospital sa probinsya.
“It started ganina because I asked the doctor if naa ba sila saktong supply sa previous (administration) and they said that they're really running out of supplies,” matud ni Baricuatro.
Si Atty. Joseph Felix Mari 'Ace' Durano, Provincial Administrator nagkanayon nga aduna na’y gigahin nga P18 million nga pundo alang sa pagpalit sa gikinahanglang mga bakuna.
Apan iyang gidugang nga ipaubos pa kini sa bidding process diin sa inisyal nga datus adunay 11 ka suppliers na ang nipadayag sa ilang kagustohan nga moapil sa bidding karong Lunes, Agusto 11.
“And I think this will be the first one that will be livestreamed," matud ni Durano sa Agusto 8.
Ugaling mahuman ang proseso, kuhaon ang supplies niini unya bahinon kini ngadto sa 16 ka mga ospital nga gidumala sa probinsya.
Giklaro ni Durano nga kini nga mga bakuna, libre nga ma-avail sa mga konstituwente.
Ang rabies usa ka infection diin ang virus niini moataki sa central nervous system nga posibleng moresulta sa kamatayon kon dili matambalan dayon.
Lakip sa mga common nga transmission niini kon mapaakan sagad sa iro o iring hilabi na ang mga saag nga hayop ug bisan pa man ang mga binuhi.
Sa Central Visayas, lakip ang lalawigan sa Sugbo sa nakatala og taas nga kaso sa mga napaakan og hayop hinungdan sa pagsaka sa kompirmadong mga kaso sa rabies virus.
Sagad sa mga rason niini ang kakuwang sa pag-report sa mga pasyente sa duol nga health centers.
Gikinahanglan ang subsob nga pagpasabot ug pagpahibaw sa mga residente nga nagbaton og giatiman nga mga hayop. / ANV