MOABOT sa P4.5 bilyunes ang nakolekta nga kita sa Cebu Provincial Treasurer’s Office gikan sa Enero hangtod sa Hunyo 2025.
Kini subay sa giluwatang dokumento ni Atty. Roy Salubre, Provincial Treasurer sa Lunes, Hulyo 21, 2025.
Subay sa maong listahan, adunay labing dako nga kita nga nakolekta gikan sa buhis sa probinsiya nga moabot sa P556, 766, 560. 30.
Kini naglakip sa Amusement Tax, Franchise Tax, Professional, Property Transfer Tax, Real Property tax, Basic General ug Special Education Fund.
Ingon man ang buhis sa delivery trucks ug vans, quarry products, monitoring fees sa quarry resources, fines ug penalties sa local taxes ug mga negosyo.
Samtang sa fees and charges moabot usab sa P223, 326, 874. 83 ang nakolekta.
Maglakip niini ang mga abang sa mga tindahan ug uban pang mga negosyo nga gitukod ug gipahimutang sa mga luna sa Probinsiya sa Sugbo, parking Waterworks Systems, electric Generation, ug uban pa.
Alang sa mga terminals, nikita ang probinsiya og moabot sa P52, 246, 175. 99 diin moabot sa P37, 597, 033.97 ang gikan sa Cebu South Bus Terminal (CSBT) samtang P14, 649, 142. 02 ang gikan sa Cebu North Bus Terminal (CNBT).
Sa mga district hospitals duna sa’y kita ang probinsiya nga moabot sa P322, 155, 658. 93 gikan sa insurance, medical consignments, medical, dental ug laboratory.
Samtang sa Capital o investments adunay income nga natala nga moabot sa P223, 893, 577. 87.
Sa kinatibuk-an adunay moabot sa P1, 378, 388, 847. 92 nga kita ang probinsiya sa local sources.
Nidako usab ang kita niini gikan sa external sources sama sa sharing gikan sa National Tax Allotment (NTA), share gikan sa Government-Owned and/or Controlled Corporation (GOCCs), PCSO, ug national tax collections nga moabot sa P3, 143, 665, 963. 03.
Sa kinatibuk-an adunay moabot sa P4, 522, 054, 810. 95 nga natalang kita ang probinsiya sa unang unom ka buwan. Gilauman kining mosaka sa mosunod nga mga buwan hangtod matapos ang 2025. / ANV