Nitugot si Cebu Governor Gwendolyn Garcia nga gamiton sa Cebu Normal University (CNU) ang bahin sa luna nga gipanag-iya niini sa Brgy. Busay, Dakbayan sa Sugbo.
Gihatagan og pagtugot sa Hunta Probinsyal si Garcia nga mohimo og kasabutan tali sa maong tunghaan aron ipagamit ang 10,000 metro kwadradong luna nga gipanag-iya sa Lalawigan.
Unang nipadala og suwat ngadto sa buhatan sa gobernador ug Sangguniang Panlalawigan ang pangu sa unibersidad, Dr. Daniel Ariaso Sr. sa Oktubre 2023, aron paghangyo og donasyon sa luna nga niabot og lima ka ektarya alang sa expansion o pagpalapad sa naasoy nga tunghaan.
Apan subay sa nauyonan sa kagamhanan, gitugotan niini ang pagsulod sa usufruct agreement tali sa unibersidad.
Sa maong agreement, gitugotan sa kagamhanan ang unibersidad sa paggamit sa luna niini sulod sa pipila ka katuigan, apan kon dunay makalapas sa lagda nga nasabutan, bawion sa Probinsya ang maong luna. / ANV