Adunay moabot sa P1 bilyon nga pundo ang Probinsiya sa Sugbo nga mahimong magamit alang sa pagpalit og mga ekipo, pagpangandam sa panahon sa kalamidad ug uban pang disaster related nga mga panginahanglanon sa lalawigan.
Kini kon mahimo na nga departmento ang Provincial Disaster Risk Reduction and Management Office (PDRRMO) nga naglihok isip usa na lang ka division human gi-downgrade sa milabay nga administrasyon.
Mao kini ang gibutyag ni Atty. Joseph Felix Mari “Ace” Durano sa mga tigbalita sa Miyerkules, Hulyo 23, 2025.
“...kana for PDRRMO calamity preparations, it can be training for responders or equipments, rescue vehicle, manpower, mao nang ang gibuhat ni Col. Pastor premiro niyang sulod nibisita siya og mga LGU nga active ang ilang mga PDRRMO, usa iyang gibisita ang Danao. Unya ni-report siya nako nga pilde pa man ang probinsiya sa Danao kay ang Danao 100 ang personnel sa PDRRMO,” matod ni Durano sa Miyerkules.
Ang P1 bilyon nga pundo naglakip sa share sa probinsiya gikan sa National Tax Allotment (NTA).
Gikan sa 2022 ngadto na sa 2025 adunay pundo nga natigom nga moabot sa P628 milyunes, lakip na ang P372 milyunes karong tuiga gikan sa Annual Appropriations.
Apan kon ugaling dili magamit ang maong pundo, mahibalik kini sa national treasury, matod ni Danny Rodas, Provincial Budget Officer atol sa pakighinabi sa mga tigbalita sa Hulyo 23, 2025.
Sa kasamtangan, ang ahensiya gihapon maoy gitagan-an sa pagdumala ug pag-coordinate sa mga local disaster ug rescue units sa probinsiya nga sa pagkakaron aduna lay duha ka mga regular personnel lakip ang hepe niini. / ANV