Naka half-mast ang bandila sa Cebu Provincial Capitol agi’g pagpadayag sa respeto ug pahasubo sa pamilya sa pagtaliwan ni kanhi Samboan Mayor ug Vice Governor Beatriz Durano-Calderon niadtong Hulyo 25, 2025.
Agi'g pagpadayag sa simpatiya sa pamilya ni Calderon, nipasar og resolusyon ang 17th Sangguniang Panlalawigan ubos ni Bokal Reluya niadtong Hulyo 28.
Si Durano-Calderon nga lumad taga Dakbayan sa Danao niserbisyo isip Bise-Gobernador sulod sa 1985-1986. Nagsilbi sab siya nga Mayor sa Lungsod sa Samboan.
Sa Martes sa hapon, Hulyo 29, hiniusang niduaw ang mga sakop sa hunta probinsyal sa haya sa kanhi opisyal diin ilang gidunol ang resolusyon nga gipasar atol sa sesyon.
Si Calderon maoy asawa ni kongresista Emerito Calderon Sr. ug inahan nila ni 7th district Rep. Peter John Calderon, Provincial Board member Raymond Joseph Calderon, ug Vice Mayor Emerito Emmanuel Calderon, Jr. (ANV)