Kapulisan nainsulto

PRO 7
PRO 7

Nainsulto ug nasuko ang kapulisan sa Central Visayas (CV) sa pagpusil-patay kang Police Corporal Ryan Languido Baculi atol sa buy-bust sa Barangay Kinasang-an, dakbayan sa Sugbo, niadtong Miyerkules, Nobiyembre 15, alas 12:05 sa kaadlawon.

Samtang, gidudahan nga dunay naghatag og impormasyon sa operasyon sa Regional Police Drug Enforcement Unit (RPDEU) sa Police Regional Office (PRO 7) batok sa duha ka mga suspek nga nipusil-patay kang Baculi nga maoy poseur buyer sa operasyon.

Tungod sa pagbangutan ug pagyukbo kang Baculi, ang bandila sa nasod sa headquarters sa Cebu Cebu City Police Office (CCPO) gipaubos sa half mast.

MANHUNT

Si Police Brigadier General Anthony Aberin, direktor sa PRO 7, nimando sa paglusad sa halapad nga manhunt batok sa duha ka mga suspek nga sila si Atong Rafols ug Ramil Salazar, pulos dunay record sa krimen.

Lakip sa ipaubos sa imbestigasyon ang giingong barangay tanod sa kasikbit nga barangay sa Kinasang-an nga giingong nitabang sa pagpasibat sa duha ka mga suspek gamit ang sakyanan sa barangay.

Kining makaguol nga panghitabo sa pagkamatay sa miyembro sa Police Regional Office 7 nga si Police Corporal Ryan Baculi nakapasuko ug nakainsulto sa tibuok pwersa sa PRO 7..,
matod ni Police Lt. Colonel Gerard Ace Pelare, tigpamaba ni Aberin.

Ang CCPO niabag na sa RPDEU 7 sa imbestigasyon sama sa pagkuha sa CCTV camera lakip na ang pagtigom og mga ebidensya labot sa krimen.

Matod ni Police Lieutenant Colonel Janette Rafter, deputy city director for operations sa CCPO, ang tanang police stations ug special units sa dakbayan motabang sa pagpangita nilang Rafols ug Salazar.

Dunay mga impormasyon nga nasigpatan ang duha sa probinsya sa Sugbo apan niawhag ang kapulisan nga motawag dayon sa labing duol nga police station aron ila ning madakpan.

NOTADO

Gibutyag ni Rafter nga si Rafols notado na nga kriminal sanglit nabilanggo na kini sa Operation Second Chance (OSC) tungod kay nakapatay sa dihang menor de edad pa ug nabalhin sa Cebu City Jail pag-abot sa legal age.

Sa paggawas sa bilanggoan, nakapatay na usab kini sa Brgy. Inayawan ug nalutsan siya og warrant of arrest sa kasong murder.

Dugang ni Rafter nga nimando si Police Colonel Ireneo Dalogdog, hepe sa CCO, ngadto sa mga police personnel nga nangita sa duha nga dili mokompyansa ug kinahanglan nga andam kanunay kon ugaling mosuway og kuha sa ilang mga armas.

Ang PRO-7 nisaad nga iha­tag ang tanang financial assistance sa pamilya ni Baculi sama sa gasto sa pagpahiluna niini sa katapusang higayon lakip na ang mga kinahanglanon sa iyang lima ka mga anak nga nahabilin.

Matod ni Pelare, ang tanang personnel sa PRO 7 dunay itunol sa nahabiling pamilya sa namatay nga polis ilabi na nga gagmay pa kaayo ang iyang mga anak.

PRO 7
Namatay sa buy-bust
PRO 7
Undercover cop killed in Cebu City drug bust

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph