Naka-full alert na ang Police Regional Office (PRO 7) aron sa paghatag og hugot nga seguridad sa ikaupat nga State of the Nation Address ni Presidente Ferdinand "Bongbong" Marcos Jr. karong adlawa, Lunes, Hulyo 28, 2025.
Matod ni Brigadier General Redrico Maranan, hepe sa PRO 7, nga sento porsiyento na sila nga andam sa pagpatuman sa seguridad sa tibuok rehiyon 7.
Usa sa ilang gipangandaman ang himuon nga lihok protesta sa mga progresibong grupo aron ipaabot ang ilang yangungu sa gobyerno.
Mipasalig si Maranan nga ilang ipatuman ang maximum tolerance ug ipatigbabaw ang tawhanong katungod sa tanan atol sa maong kalihukan.
“We will observe maximum tolerance and uphold human rights at all times. Our personnel are trained and directed to treat all individuals with professionalism and respect, particularly during peaceful public assemblies," matud sa heneral.
Dugang ni Maranan nga nag-andam sila og mga personnel nga ipakatap sa kadalanan ilabi na sa dapit diin magtapok ang mga progresibong grupo lakip na niini ang quick response team nga maoy moresponde kun dunay krimen.
Ang pagpakatap sa mga police personnel pinasubay kini sa kamandoan ni PNP Chief Police General Nicolas Torre III alang sa kaluwasan sa publiko.
“As we protect our communities, we also stand as guardians of democratic rights,” dugang ni Maranan. Awhag ni Maranan sa katawhan nga magpabilin nga mabinantayon ug moreport dayon kun aduna silay mamatikdan nga kadudahan sa ilang palibot aron mahatagan dayon nila kini og aksyon. / AYB