NAGTINGKAGOL sa bilangguan ang usa ka 26-anyos nga lalaki human gipasanginlan nga nangulata sa iyang live-in partner kaadlawon sa Hulyo 3, sa Poblacion Pardo, Dakbayan sa Sugbo.
Giila ang suspek sa alyas nga Jake kanhi delivery boy, samtang ang biktima mao si alyas Marie 27, usa ka encoder nga parehong nagpuyo sa nahisgutang dapit.
Base sa imbestigasyon, nagpakitabang ang biktima sa kapulisan dihang nakaangkon siya og bun-og sa agtang kay gikulata sa iyang kapuyo nga nakainom niadtong higayona.
Apan nangatarungan ang suspek nga ang bun-og nga naangkon sa iyang live-in partner tungod sa pagkaigo sa ilang hagdanan dihang nag-inilogay sila sa selpon.
Sa wala pa ang panghitabo, naglalis ang duha tungod kay nasuko ang biktima nga nauli iyang kapuyo kaadlawon na. / JDG