NAANGOL ang usa ka ulitawo human gidunggab sulod sa diskuhan alas 4:00 sa kaadlawon, Miyerkules, Hunyo 25, 2025, sa Barangay Polo, Lungsod sa Alcantara.
Si Neil Jay Ypanto, 25, walay trabaho, taga Barangay Palanas, Lungsod sa Alcantara nakaangkon og samad dinunggaban sa iyang lawas nga gidala sa Vicente Sotto Memorial Medical Center (VSMMC).
Ang suspek si Ryan Ypanto, hingkod ang panuigon, usa Person’s With Disability (PWD), ig-agaw sa biktima nga nagpuyo sa nahisgutang lugar, ug nadakpan sa kapulisan.
Si Police Senior Master Sgt. Richard Cababat, imbestigador sa Alcantara Police Station nga nahinabi sa Sunstar Superbalita Cebu, niingon nga ang biktima uban sa iyang mga higala nag-disco.
Ang ig-agaw nga suspek duna say laing mga kauban.
Nibutyag si Ryan nga giunhan siya og bunal sa botelya sa biktima ug igo lang siyang nibalos.
Atol sa kaguliyang, nadunggaban sa suspek iyang ig-agaw gamit ang kitchen knife.
Kasong frustrated murder giandam sa kapulisan batok sa suspek. / GPL