Motabang ang Kagamhanan sa Probinsya sa Sugbo aron mapundohan ang pagpabalhin ug pagpahiuli sa karaang riles sa Perrelos, Dakbayan sa Carcar alang sa himuong road-widening project sa lugar.
Kini maoy gisaad ni Cebu Governor Gwendolyn Garcia atol sa tigom niini kauban si Carcar City Mayor Patrick Barcenas, mga opisyal sa DPWH - District 1 Engineering Office, heritage consultant Dr. Jose Eleazar Bersales, ug mga tag-iya sa pribadong mga luna.
Ang historic railway station ibalhin sa kasamtangan nga tourist rest area (TRA) duol sa City Hall diin ipahimutang ang replica.
Sa nasayran, nahunong ang road widening project sa DPWH tungod sa nag ung-ong nga railway sa tren sa naasoy'ng lugar.
Apan matod ni Garcia nga ang maong railway station mahimo usab nga madugang sa atraksyon sa siyudad isip kabahin sa history niini.
Ang heritage consultant sa probinsya nga si Bersales nagkanayon nga ang Perrelos station usa ka fourth-class railway station sa Philippine Railway Company ug usa sa mga makita pa nga mga train stations sa Sugbo nga wala gyud mahilabti sukad pa kaniadto.
Makita usab ang usa niini sa Simala Elementary School sa lungsod sa Sibonga duol usab sa national highway.
Ang gobernador daan na kining nipasidaan nga kinahanglan nga ipreserbar ang mga karaang lugar, ug importanteng mga butang nga kabahin sa kaagi sa Sugbo.
Gawas niini, nasabutan usab sa maong tigom nga i-preserbar ang heritage structure nga 100 anyos nga heritage house nga gipanag-iya sa pamilya'ng Libor nga maapektuhan sa road widening sa dakbayan sa Naga.
Gikatakda usab nga i-iswag ang istruktura sa laing bahin sa luna nga gipanag-iya gihapon sa mga sumusunod samtang mohatag usab sa insaktong compensation ang DPWH alang sa relocation niini. / ANV