Karambula sa 8 ka sakyanan, 10 samdan

GITABANG: Usa sa mga pasahero sa tulo ka mga motorsiklo nga gidaro sa usa ka taksi gitabang sa mga paramedics atol sa insidente sa Dalan P. Del Rosario Extension ug J. Alcantara pasado alas 6 sa Lunes sa buntag, Hunyo 3, 2024.
GITABANG: Usa sa mga pasahero sa tulo ka mga motorsiklo nga gidaro sa usa ka taksi gitabang sa mga paramedics atol sa insidente sa Dalan P. Del Rosario Extension ug J. Alcantara pasado alas 6 sa Lunes sa buntag, Hunyo 3, 2024. ARNOLD Y. BUSTAMANTE

Walo ka mga sakyanan nagkarambula sa Dalan P. del Rosario Extension ug J. Alcantara, Sambag 1, Dakbayan sa Sugbo, pasado alas 6 sa buntag sa Lunes, Hunyo 3, 2024.

Tungod sa insidente, napulo ka mga tawo samdan, apan duha lang ang nadala sa tambalanan nga pulos mga babaye.

Ang disgrasya naglambigit sa upat ka mga taxi, usa ka L300 van ug tulo ka mga motorsiklo nga naghunong sa maong dapit samtang nagpaabot sa go signal sa traffic light sa eskina sa N. Bacalso Avenue.

Unang nadaro sa DR. J Taxi nga gimaneho ni Paul Degron, 60, residente sa Green Valley, Brgy. Lahug, Dakbayan sa Sugbo mao ang mga motorsiklo, lakip na ang duha ka mga taxi.

Nalahos pa niya pagdaro ang L300 van nga nibangga usab sa nag-una nga laing taxi unit.

Ang mga sakay sa duha ka mga motorsiklo nga pulos mga babaye nagrabehan nga mao ang gipangdala sa tambalanan.

WA MAKATULOG

Giangkon ni Degron nga siya ang nakabangga sa maong mga sakyanan apan iyang gihimakak nga siya nakatulog.

Matod niya nga gihatod niya ang iyang asawa apan natingala na lang siya nga iya na lang nga nadaro ang mga sakyanan nga naghunong.

“Wala may problema ang akong sakyanan, Sir. Natingala na lang ko nga naingon ani ni,” matod ni Degran.

Apan ang drayber sa CTC taxi nga iyang naigo nagkanayon nga kusog kaayo nga nakapadagan si Degran.

Ang una niya nga naigo mao ang mga motorsiklo nga pulos nangalagpot sa layo hangtod nga iya pa nga nadaro ang nag-una nga mga sakyanan.

“Nanglupad tawon ang mga naigo niya, Sir, pwerting kusoga lagi,” matod sa taxi driver.

Kasamtangan nga gikustodiya sa Traffic Enforcement Unit sa Cebu City Police Office (CCPO) si Degran ug nisaad nga iyang tubagon ang salaod nga nahimo. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph