Karibal sa gugma 'gi-icepick’ sud sa bus

Balamban, Cebu.
Balamban, Cebu. Google Maps

Natusaktusak sa ice pick ang nagkadaiyang bahin sa lawas sa usa ka lalaki nga gidunggab sa iyang karibal sa gugma nga ex sa iyang bag-ong kapuyo samtang nagkatupad og lingkod sa bus nga pasaheroan mga ala 1:30 sa Lunes sa hapon, Pebrero 5, 2024.

Nagkaguliyang ang mga pasahero sulod sa bus terminal sa Brgy. Santa Cruz, Balamban human nila makita ang hitabo.

Ang biktima giila nga si Michael Lumangtad, hamtong, adunay kapuyo, taga Brgy. Matab-ang, Toledo City.

Ang suspek giila nga si Jason Lumbrino, 29, ulitawo, giingong kanhi live-in partner sa kapuyo karon ni Lumangtad.

Sila si Lumangtad ug Lumbrino managsilingan ug giingong nagkaribal sa gugma sa usa ka babaye.

Ang babaye kapuyo kaniadto ni Lumbrino apan gibiyaan siya niini kay toa na nahigugma kang Lumangtad ug nagpuyo na ang duha sulod sa usa ka buwan.

Base sa imbestigasyon sa Balamban Police Station ubos sa pagdumala ni P/Lt. Colonel Joey Bicoy, selos ang ilang natino nga motibo.

Nasayran nga magdala-dala og ice pick ang suspek kay sa hi­ga­yon nga iyang masugatan si Lu­mangtad, iya kining dunggabon ug nanganti nga iya’ng patyon.

Nataymingan ni Lumbrino ang biktima nga kasakay sa bus hi­­nung­dan nga iyang giatake ug way pagduhaduha gihansakan sa ma­kadaghang higayon sa ice pick.

Dali nga nakapangayo og tabang ang mga tawo ug dali sab nga niabot ang ambulansiya ug gidala sa tambalanan ang nagkadugo nga biktima.

Nakahimo pa sa paglakaw si Lumangtad nga giagak sa bystander nga gisakay sa bus. Samtang ang suspek dali nga nga nisibat ug nitago sa balay sa iyang igsuon sa Barangay Talavera.

Ang igsuon mao nay nidala sa suspek sa barangay hall aron sa pagpasurender ug gidakop sa mga polis.

Atol niining pagsuwat wa pa matino ang kahimtang sa biktima taliwa sa daghang mga samad nga iyang naangkon.

Kasong frustrated murder ang giandam sa kapulisan batok sa suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph