Makasinati og mas hugot nga lagda ang mga ganahan mo-touring sa Transcentral Highway human giduso ni Balamban Mayor Amos Edwin Cabahug ang usa ka ordinansa nga nag-regulate sa kasaba ug nagpatuman sa speed limit sa mga sakyanan.
Kini agi og tubag sa dugay nang reklamo sa mga residente.
Sa usa ka suwat nga pinetsahan og Hulyo 11, 2025, ug gi-post sa opisyal nga Facebook page nga “Balamban Karon,” si Mayor Amos Edwin Cabahug, uban ang “Certificate of Urgency,” pormal nga ni-endurso sa lima ka legislative measures ngadto sa Sangguniang Bayan (SB) pinaagi ni SB Secretary Rufo Hayag aron maapil sa sunod nga sesyon sa konseho.
Ang Transcentral Highway, nga nagsumpay sa Cebu City sa sidlakan ngadto sa lungsod sa Balamban sa kasadpan, nahimong hotspot dili lang sa nindot nga talan-awon apan sa delikado usab nga pagmaneho, diin ang uban niresulta sa trahedya.
Gawas sa aksidente sa dalan, usa ka report gikan sa SunStar Cebu kaniadtong Oktubre 17, 2024, nagkanayon nga nireklamo ang mga residente sa walay tulog nga gabii tungod sa kasaba mga motorsiklo.
Dunay mga motor nga ilegal nga giusab ang tambutso nga nagkarera subay sa highway, ilabi na sa gabii.
Nailhan usab ang maong dapit sa “motor banking”—usa ka high-speed nga maneuver nga ang mga rider moliko pinatakilid sa mga kurbada nga dalan sa bukid.
Sukad nga nilingkod si Cabahug sa katungdanan niadtong Hunyo 30, kini ang una niyang dakong agenda nga gipadala sa SB.
Laing gisugyot nga lakang mao ang pagtangtang sa bayad alang sa paggamit sa publikong kasilyas sa tibuok Balamban.
Ang laing butang nanawagan alang sa pagwagtang sa entrance ug uban pang bayad sa Cambuhawe Spring, usa ka popular nga publikong resort nga nahimutang sa Barangay Cambuhawe sa lungsod sa Balamban.
Giduso usab ni Cabahug ang pagbutang og opisyal nga smoking areas sulod sa munisipyo apil ang pagpahamtang og silot alang sa mga tawong masakpan nga nanigarilyo sa publikong lugar gawas niining mga designated zones.
Aron matabangan ang mga lokal nga mag-uuma ug ubos og kita , gitinguha ni Cabahug nga di na pabayron sa rental fees alang sa paggamit sa mga traktora nga gipanag-iya sa munisipyo. / CDF