Ang Philippine Offshore Gaming Operators (Pogos), usa ka online nga serbisyo sa sugal sama sa electronic casino ug sports betting, ug uban pa,alang lamang sa mga kostumer sa gawas sa nasod.
Kadaghanan sa ilang mga kliyente mga Intsik tungod kay ang sugal kasagaran ilegal sa China, gawas sa state-run nga mga lottery.
Ang mga mananaya mopusta ug makadawat og bayad pinaagi sa nagkalain-laing online nga mga plataporma nga pinansyal.
Samtang ang Pogos nagsugod sa ilang operasyon sa Pilipinas niadtong 2003, sila mihugot og pamaagi sugod sa 2016 sa dihang ang administrasyon ni kanhi Presidente Rodrigo Duterte nga nagpaluag sa mga polisiya sa internet nga sugal sa nasod sa konsiderasyon sa kita ug paghimo og daghang mga trabaho alang sa mga Pilipino.
Sa dili pa sila maka-operate, ang Pogos kinahanglan mokuha og lisensya sa operasyon gikan sa Philippine Amusement and Gaming Corp. (Pagcor).
Adunay tulo ka mga kategoriya: nga mao ang dealers nga maghimo og online nga mga dula pinaagi sa live streaming, samtang ang ikaduha ug ikatulo mga sub-sector sa Business Processing Outsourcing (BPO) nga nagtutok sa back-office nga serbisyo.
Ang Pagcor niingon nga ang gidaghanon sa lisensyado’ng Pogos sa nasod miabot sa labaw sa 300 niadtong 2019, nga naghatag og kapin sa P7 bilyon nga bayad sa lisensya.
Ang Department of Labor and Employment (Dole) niingon nga niadtong 2019, sa kapin sa 118,000 ka mga trabahante sa Pogo, 21,000 ra ang mga Pilipino.
EKONOMIYA
Sa usa ka pamahayag niadtong Martes, Hulyo 23, 2024, si Department of Finance Secretary Ralph Recto niingon nga ang gibana-bana nga kinatibuk-ang ekonomikanhong benepisyo sa Pogos miabot ra sa P166.49 bilyunes matag tuig.
Mas ubos kaysa gibana-bana nga kinatibuk-ang ekonomikanhong gasto nga P265.74 bilyunes matag tuig. Kini nagpasabot og mga P99.52 bilyon nga net cost alang sa nasod matag tuig.
Ang ekonomikanhong mga benepisyo naglakip sa kita sa gobyerno, sama sa kita sa buhis gikan sa Bureau of Internal Revenue (BIR), ingon man gross gaming revenues gikan sa Pagcor, kita gikan sa mga abang sa opisina ug residential nga mga espasyo, transportasyon, ug uban pa.
BAN NI MARCOS
Ang Presidente mipahibalo sa pag-ban atol sa iyang ikatulong State of the Nation Address (Sona) sa Hulyo 22, 2024.
Gihisgutan ni Marcos ang mga ilegal nga kalihukan sa Pogos nga nagtakuban ingon mga lehitimong entidad sama sa financial scamming, money laundering, prostitution, human trafficking, kidnapping, brutal torture ug bisan pagpamatay.
Sa milabay nga mga tuig, ang mga otoridad ninglusad og lainlaing mga raid sa mga Pogo firms; ang uban kanila adunay mga luho nga pasilidad, sama sa ilang kaugalingong KTV bars ug bisan dili lisensyadong mga medikal nga klinika.
Ang mga Pogos sa nasod gilauman nga mohunong na sa ilang mga operasyon sa Disyembre 2024 subay sa mando sa Presidente.