Gibasura sa Cebu City Prosecutor’s Office ang kasong robbery in band nga unang gipasaka batok kang Jigger Geverola kinsa gipasanginlang utok sa pagtulis sa Oro Sugbo Pawnshop sa downtown area sa dakbayan sa Sugbo niadtong Nobiyembre 25, 2023
Si Geverola gidakop sa kapulisan pinangulohan ni Cebu City Police Office (CCPO) Chief Colonel Ireneo Dalogdog niadtong Nobiyembre 28, nunot sa extra-judicial confession nila ni Dann Carlo Geverola Flores ug Jordan Ramos Baquiano nga iya silang gimandoan sa pagkuha sa karaan nga Honda Civic nga kolor puwa.
Ang sakyanan nga gigamit sa mga tulisan isip getaway vehicle ug gitagoan kini sa bukid sa Argao.
Niadtong Lunes, Disyembre 18, 2023, gibasura sa Cebu City Prosecutor’s Office ang kaso ni Geverola tungod kay way igong ebidensya.
Atol sa inquest proceeding niadtong Disyembre 1, si Geverola nipili sa pagpasaka og waiver of detention ug nihangyo nga ipahigayon ang preliminary investigation ug gihatagan og 10 ka adlaw sa pagsumiter og counter-affidavit ug counter evidence samtang giandam ang impormasyon ngadto sa ubang mga suspek nga nalambigit sa tulisan.
Giduso ni Geverola ang iyang counter-affidavit niadtong Disyembre 11. Si Vincent Isles, usa ka abogado nga nagdepensa kang Geverola, niingon nga ang piskaliya nagtuo nga walay igong ebidensiya aron makonbikto ang iyang kliyente sa bisan unsang krimen.
Si Geverola maoy gitumbok sa Affidavits of Confession ni Flores ug Baquiano diin human niadto sila si Flores ug Baquiano niila kang Geverola sa rogue gallery sa kapolisan.
Sa counter-affidavit nga gisumitir ni Geverola iyang gihimakak ang iyang kalambigitan sa pagpanulis ug nagkanayon nga walay evidentiary weight ang pagsugid nila ni Flores ug Baquiano.
Si Geverola niingon nga dili unta niya igkita si Baquiano sa Argao human siya nag-surveillance niadtong Nobiyembre 21 sanglit didto si Geverola sa Tagbilaran City aron pagkuha sa gikinahanglang clearances alang sa Bar Examination.
Mibiyahe si Geverola sa alas 2:30 sa hapon balik sa Cebu City ug niabot sa iyang pinuy-anan sa Mambaling sa 7:00 sa gabii.
Recil Ersan Geverola nga asawa ni Jigger ug Jeralyn Oca, Bar Operations Chairperson sa Southwestern University - PHINMA (SWU PHINMA) College of Law mipatuman sa ilang affidavit nga nagkompirmar sa estorya ni Geverola nga gilakip mao ang mga screenshot sa ilang panag-estorya bahin sa maong butang.
Dugang pa ni Geverola nga niadtong Nobiyembre 23 nanarbaho sa Cebu Provincial Capitol isip job order employee.
Ang hukom sa prosecutor’s office nirekomendar nga ibasura ang kaso batok kang Geverola ug ang mga arresting officer gimandoan nga buhian siya sa kustodiya sa kapolisan.
Samtang gitahod sa Police Regional Office ang desisyon sa Department of Justice sa pag-dismiss sa kasong robbery in band nga gipasaka sa kapulisan sa dakbayan sa Sugbo batok ngadto ni Jigger Geverola ang gitumbok nga mastermind sa pagtulis sa Oro Sugbo niadtong Nobyembre 25, 2023.
Matod ni Police Lieutenant Colonel Gerard Ace Pelare spokesperson ni Police Brigadier General Anthony Aberin hepe sa kapulisan sa Central Visayas nga adunay ebidensiya ang Cebu City Police Office, apan dili pa kini makabarog maoy hinungdan sa pagka -dismiss sa kaso.
Apan giklaro nga kon basahon ang resolution sa Cebu City Prosecutors office adunay nakabutang nga without prejudice nga nagpasabot nga mamahimo pa nila nga ikiha si Geverola kon adunay igong ebedensya.
Dugang ni Pelare nga sila sa kapulisan wala mosalikway sa kalambigitan ni Geverola sa nahitabong krimen sanglit duna silay ebedensya nga nagtumbok apan naka sabot sila sa DOJ gumikan sa bag-ong standard sa pag-file sa kaso nga kinahanglan nga dunay “reasonable certainty of conviction” o kasigurohan nga makombikto ang gipasanginlan subay sa kalig-on sa ebedensya. / Uban sa taho ni Arnold Y. Bustamante