Nagpadayon ang pagsaka sa mga kaso sa African Swine Fever (ASF) sa Negros Oriental, diin ang Lungsod sa Bindoy mao ang labing ulahing lungsod nga nakatala sa maong sakit, sumala sa Provincial Veterinary Office (PVO) niadtong Huwebes, Agusto 20, 2026.
Gibutyag ni Acting PVO chief Vernon Lumbania ngadto sa Philippine News Agency nga ang Bindoy usa sa tulo ka local government units (LGUs) sa probinsiya nga aduna pay aktibong mga kaso sa ASF.
“As of today, Aug. 20, the three LGUs with active ASF cases are Bindoy, Pamplona, and Siaton, meaning the cases continue to rise,” matod ni Lumbania.
Gipakita sa datos gikan sa PVO nga ang Siaton nakatala og 31 ka positibong kaso gikan sa 34 ka mga sample, ang Amlan adunay 24 gikan sa 55, ang Tanjay City adunay 39 ka positibo ug lima ka negatibo, ug ang Bayawan City adunay 32 ka positibo ug 46 ka negatibo gikan sa 78 ka mga sample.
Ang Pamplona nakatala og 28 ka positibo ug lima ka negatibo gikan sa 33 ka mga sample, samtang ang Zamboanguita adunay unom ka positibo ug 11 ka negatibo.
Ang Bindoy adunay lima ka positibo ug lima ka negatibong mga sample.
Matod ni Lumbania, gawas sa tulo ka lugar nga giklasipikar nga aktibo, ang pagkatap sa sakit sa ubang apektadong lugar napugngan na pinaagi sa gipalig-on nga mga lakang sa biosecurity aron malikayan ang pagkaylap niini ngadto sa mga silingang barangay.
Ang mga LGU nga kaniadto nakatala og mga kaso sa ASF apan karon negatibo na sa mga pagsulay naglakip sa La Libertad, Dauin, Mabinay, Canlaon City, Santa Catalina, ug Valencia.
Ang mga sample sa dugo gikan sa mga baboy niining mga lugara nagpakita nga negatibo sila sa ASF, matod niya.
Dugang pa ni Lumbania, gikatakda na ang pag-ihaw sa mga nataptan nga baboy sa mga apektadong lugar. / PNA
