Nanawagan si Barili Mayor John-John Garcia sa mga residente sa lungsod nga manglimpyo ug manghawan sa tugkaran aron kalikayan ang pagkatap ug pagsaka sa mga kaso sa dengue ug typhoid fever.
Ang typhoid fever usa ka bacterial infection nga makuha gikan sa pagkaon o contaminated nga tubig ilimnon sa mga molupyo.
Si Garcia nihangyo sa mga residente nga sigurohon niining wala’y napundo nga tubig nga mahimong “breeding ground” o ka-itlugan sa mga lamok nga nagdala og dengue virus.
Gawas niini, gipahinumdoman usab sa mayor ang mga ginikanan nga i-check ang kalimpyo sa tubig sa dili pa kini imnon, ug kon mahimo, pabukalan aron mas luwas kining imnon.
Ang Barili Rural Health Unit (RHU) gimandoan na usab nga mopahigayon og entomological survey aron masuta ang mga barangay nga aduna’y nagkataas nga mga kaso sa dengue ug tipos.
Kon mahuman ang survey, mao kini nga datos ang himuong basehan sa mga lakang nga ipatuman sa matag barangay.
Samtang, ang Municipal Environment and Natural Resources Office (Menro) nipahigayon sa subsob nga pagpanglimpyo sa mga kanal ug agianan sa tubig aron maseguro ang kaluwasan sa tanan.
Kahinumdoman nga sa Hunyo 2022 natala ang giingong mga kaso sa typhoid fever ug dengue sa maong lungsod.
Sa tipos, ang kontaminado nga tubig ang gitumbok nga hinungdan sa pagkaylap sa maong sakit sa usa ka dapit sa lungsod.