Nagpadala og hangyo ang kapulisan sa Dakbayan sa Lapu-Lapu sa usa ka ride-hailing app nga gigamit niadtong taxi driver nga gituohang gitulis ug gipatay, aron ma-access ang iyang bag-ong passenger activity nga gilaumang makatabang sa kaso.
Ang tigpamaba sa Lapu-Lapu City Police Office (LCPO), Lt. Col. Christian Torres nibutyag nga padayon ang imbestigasyon sa kamatayon ni Johnny Burdas, 47, nga taga Sitio Ka-Isko, Barangay Mactan.
Pila ka oras sa wala pa ang pagpusil, gipakaon pa ni Burdas ang iyang pamilya og sinugbang manok ug pizza.
Sumala sa iyang asawa nga si Clara, usa ka buotan ug mapinanggaon nga amahan si Johny, ug wala kini naghisgot og bisan unsang hulga.
Nagtuo ang kapulisan nga gitulis si Burdas sulod sa iyang taxi ug nakaangkon siya og grabeng samad pinusilan sa ulo ug abaga.
Gipangita na sa kapulisan ang usa ka person of interest nga nailhan isip usa ka tulisan sa maong lugar.
Wala sab gisalikway ang ubang posibleng motibo, sama sa personal nga dumot.
Naglaom ang pamilya ni Burdas nga makab-ot ang hustisya. / DPC