Atol ning pagsuwat, gisusi pa sa kabomberuhan ang tabitabi sa mga residente sa Sityo Gemilina, Brgy. Quiot, Dakbayan sa Sugbo nga ang gibiyaan nga katol maoy tinubdan sa sunog sa maong dapit, alas 9:58 sa buntag, Martes, Oktubre 29, 2024.
Moabot sa 12 ka balay ang gilamoy sa kalayo nga gikatahong nagsugod sa balay sa usa ka Rena Solomon.
Matod pa ni SF02 Wendell Villanueva, tigpamaba sa Cebu City Fire Department nga ilang giimbetar si Solomon alang sa ilang gihimong pakisusi apan wa kini mopatim-aw aron sa pagpadayag sa iyang habig human nga mga silingan nitumbok nga nagsugod sa iyang balay ang kayo ilabi na nga way kuryente ang maong panimalay.
Nasayran nga adunay walo ka balay ang naugdaw samtang upat ang partially burned.
Pasabot ni Villanueva nga tungason ang lugar ug mga gagmay’ng fire trucks lang ang maka-penetrate, gibanabana nga moabot sa P675,000 ang danyos sa sunog./GPL