Kaubang PUPC ‘labanan’

NALIPAY: Bisan naa sa sulod sa detention cell sa Cebu City Police Office (CCPO), malipayon ang dagway ni Jigger Geverola (tuo) uban sa usa ka polis dihang niatubang sa mga sakop sa media sa Miyerkules, Disyembre 6, 2023, aron kuhaan sa iyang reaksyon bahin sa iyang pagpasar sa 2023 Bar examinations. Nasikop siya human gitudlong suspek nga utok sa pagtulis sa Oro Sugbo Pawnshop sa dalan Colon niadtong Nobiyembre 25, 2023. / Arnold Y. Bustamante
NALIPAY: Bisan naa sa sulod sa detention cell sa Cebu City Police Office (CCPO), malipayon ang dagway ni Jigger Geverola (tuo) uban sa usa ka polis dihang niatubang sa mga sakop sa media sa Miyerkules, Disyembre 6, 2023, aron kuhaan sa iyang reaksyon bahin sa iyang pagpasar sa 2023 Bar examinations. Nasikop siya human gitudlong suspek nga utok sa pagtulis sa Oro Sugbo Pawnshop sa dalan Colon niadtong Nobiyembre 25, 2023. / Arnold Y. Bustamante

Labanan nga pro bono o libre ni Jigger Geverola, kinsa usa sa 3,812 nga ningpasar sa 2023 Bar exams, ang kaso sa 41 ka persons under police custody (PUPC) nga kauban niya sulod sa selda sa Cebu City Police Office (CCPO)

Si Geverola, taga lungsod sa Argao, gidakop sa kapulisan human gitudlo sa ubang mga suspek nga utok sa pagtulis sa Oro Sugbu Pawnshop sa dalan Colon, dakbayan sa Sugbo niadtong Nobiyembre 25, 2023.

“Una nakong kliyente ang kauban nako diri sa selda ta­nan ron 41 kabuok pro-bono.Pero una pa na, mo-sign pa gyud ta sa roll of attorney mao nang hopefully makalabang ta ani karon,” matod ni Geverola, sa interbyo sa mga tigbalita sa Miyerkules, Disyembre 6, 2023, kana kon siya hingpit na makapanumpa nga abogado.

Atol sa iyang pag-atubang sa media, gipadayag niya nga nagsagol ang iyang kalipay ug kaguol.

Matod niya, nalipay siya nga nakapasar sa Bar exams ug natuman na ang iyang pangandoy, apan sa pikas bahin, dili pa gawasnon tungod sa pagka­bilanggo sa pagka­lambigit sa kaso sa tulis.

Apan positibo siya nga ma­kalingkawas ra siya sa iyang giatubang nga kaso ug dako ang iyang pasalamat sa mga tawo nga ningtabang usab niya karon.

Kon mahingpit na siya nga abogado, gipasalig ni Geverola nga gamiton niya ang iyang nakab-ot nga kalampusan sa pagtabang sa mga tawo nga nanginahanglan.

Usa sa iyang tabangan ug labanan sa korte ang 41 ka PUPC sa CCPO nga walay bayad.

Iya usab nga itugyan sa iyang abogado ang sunod nga lakang ilabi na sa iyang pagpanumpa nga mahingpit na siya nga usa ka manlalaban.

Nasayod na siya sa consequence o linugdangan nga dili dayon siya makahurar sanglit duna pa man siyay giatubang nga kaso.

Wala na siya maghisgot sa iyang kaso kay alang niya, nasang-at na ang reklamo ngadto sa buhatan sa piskaliya.

Ang mga polis ug ang iyang asawa na ang ningpahibawo kaniya nga nakapasar siya sa Bar exams.

Giangkon ni Geverola nga ikaduha na niya nga kuha sa Bar exams sanglit napakyas man siya sa unang take niya niadtong 2021.

Nahuman sa iyang kurso si Geverola sa AB Local Governance Administration sa Cebu Technological University (CTU) main campus diin pioneering siya sa maong kurso nga giablihan sa tunghaan.

Nieskwela dayon siya sa kursong abogasiya sa University of the Visayas (UV) niadtong 2015 ug nibalhin sa Southwestern University (SWU) PHINMA niadtong 2017-2018.

Iyang gibutyag nga samtang naa siya sa sulod sa bilanggoan sulod sa pipila ka tuig, nagsugod na siya og basa sa mga libro sa abogasiya.

Niadtong 2011, sa dihang napaway-sala sa mga kaso nga iyang giatubang, nihukom siya nga mobalik pagtungha sa kolehiyo ug natapos niadtong 2015.

Kon hatagan og kahigayu­nan nga makapanumpa ug mabutang ang iyang ngalan sa roll of attorney, magpada­yon siya sa pagpangalagad sa katawhan sa probinsya sa Sugbo sanglit anaa man siya nagtrabaho sa buhatan ni Bise Gobernador Hilario Davide III ug Board Member Raymond Calderon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph