DYUTAY nga kausaban ang gipahibalo sa bag-ong Mayor sa Mandaue City, si Thadeo Jovito “Jonkie” Ouano, sa komposisyon sa mga departamento sa City Hall sa pagsugod sa bag-ong administrasyon.
“Actually, daghan man mabilin. Very minimal changes lang, wala kaayo tay giusab—especially sa mga critical offices like Traffic Enforcement Agency of Mandaue (Team), Mandaue City College (MCC), ug Mandaue City Hospital. Wala gyud tay gipang-usab diha,” matod ni Ouano niadtong Lunes, Hunyo 30, 2025.
Gibutyag sa mayor nga ang proseso sa transisyon mag-una sa pagpadayon ug kalihukan.
Ang mga posisyon lamang nga giisip nga gikinahanglan alang sa pag-reassign ang susihon ug i-adjust.
“We will evaluate who really needs to be replaced. Kon dili man gani necessary, nganong ato pa mang usbon?” dugang niya.
Isip kabahin sa mga paningkamot sa transisyon, gimanduan ang mga departamento sa City Hall sa pagsusi sa ilang imbentaryo sa mga kabtangan, cash on hand, ug mga rekord sa empleyado. Kini nga audit nagtumong sa pagsiguro sa hapsay nga pagtunol ug pagsulbad sa bisan unsang kal-ang sa operasyon. / CAV