Makadawat og bonus nga tag P30,000 ang mga kwalipikadong empleyado gikan sa elective ug appointive, apil ang permanent, co-terminous ug casual employees sa kapitolyo.
Samtang tag P20,000 usab nga compensation premium ang madawat sa mga kwalipikadong Job Order employees.
Subay sa talaan adunay gibanabana nga 3,000 ka mga empleyado ang kapitolyo.
Kini human giaprubahan sa Sangguniang Panlalawigan ang Supplemental Budget No. 1 ubos sa General fund paggahin og moabot sa P306,075,000 nga pundo nga gipangamahanan ni Bokal Celestino “Tining” Martinez atol sa regular session niini sa Lunes, Hulyo 21, 2025.
Subay niini nakahan-ay na ang mga kalihukan alang sa pagsaulog sa ika-456 nga kasumaran sa Lalawigan sa Sugbo sa Agusto.
Gipahibalo ni Ainjeliz De la Torre-Orong, sa Provincial Information Office nga naglakip sa mga programa nga gihan-ay ang fiesta sa kapitolyo, agri-fair alang sa pag-display sa mga produkto ug delicacy sa mga kalungsoran sa lalawigan.
Apil niini, ang forums alang sa nagkadaiyang sektor sa probinsiya, Provincial Youth fair uban sa SK federation; Employees Day, ug ang Caravan of Services nga ipahigayon sa mga isla sa Camotes ug Bantayan.
Tapuson ang selebrasyon sa State of the Province Address (Sopa) ni Cebu Governor Pamela Baricuatro alang sa mga nahimo niini sa unang 100 ka adlaw sa iyang paglingkod. / ANV