Ang empleyado sa Lapu-Lapu City Hall nga nalambigit sa road rage gihatagan og 72 oras sa pagduso sa iyang tubag batok sa reklamo nga gisang-at sa laing drayber sa motorsiklo nga iyang gika-engkwentro niadtong Miyerkules, Hunyo 18, sa Barangay Basak, Lapu-Lapu City.
Si Lapu-Lapu City Administrator Danilo Almendras miingon sa interview sa SunStar Cebu niadtong Biyernes, Hunyo 20, nga ang sunod nga lakang mahibaw-an human sa husay sa duha ka partido nga i-iskedyul human maka-submit og tubag ang akusado.
Matud niya nga ang posibilidad sa usa ka settlement o pagsang-at og kaso magdepende sa desisyon sa biktima.
“Kung ang reklamante modesisyon nga ipadayon ang kaso, ang Committee on Service Commission magpahigayon sa ilang imbestigasyon ug morekomendar sa silot niini ngadto sa mayor,” matud ni Almendras.
Sa iyang social media post, ang biktima misaysay nga samtang padulong siya nga maghatod sa iyang asawa sa trabahuan niini sa export processing zone sa Barangay Basak, nabantayan niya nga nilugapak ang likod sa iyang motorsiklo nga daw dunay nagduso kanila.
Pagtan-aw niya, iyang nasayran nga naigo kini sa lain nga motorista, nabuak ang plaka sa kakusog sa pagkabangga, ug natangtang ang signal light sa motor.
Apan, imbes nga mohunong, misulay paglayas ang empleyado sa Lapu-Lapu City Hall, hinungdan nga iya kining gigukod.
Ang reklamante niingon nga iyang naabtan ang nakabangga kaniya duol sa Basak Barangay Hall ug didto iya kining gisultihan sa danyos sa iyang motorsiklo.
Apan wa kini mohunong hinungdan nga iya kining gibabagan.
Imbes nga makig-areglo, ang trabahante sa siyudad nikuha og tubo dayon’g bunal sa biktima.
Ang sitwasyon misangko sa sinumbagay.
Nahunong lang ang away dihang giuwang sa ilang mga asawa. / Necolyn Claire Balansag, CNU Intern ug Yvon Maratas, Benedicto College Intern