Moabot sa 9,000 ka mga turista ang natala nga ningdagsa sa lungsod sa Badian aron maglulinghayaw, magsuroysuroy ug mo-explore sa tourist activities sa lugar atol sa taas nga bakasyon.
Gipahibawo ni Vincent Earl Endab, tourism officer sa lungsod sa Badian, nga ilang natala ang 9, 299 ka mga turista sugod sa Oktubre 27 hangtod Nobiyembre 5, 2023, nga maoy uwahing adlaw nga makalaag usab ang kadaghanan gumikan kay mibalik na sa trabaho ug eskwela sa Nobiyembre 6.
Ang Lungsod sa Badian nabantog sa maanindot niini nga Kawasan Falls nga gawas sa talan-awon, may canyoneering activities usab kini nga mahimo’ng ma-enjoy sa mga turista.
Sa maong datos 4, 387 ang ningdagsa nga mga langyaw samtang 3, 023 ang mga lokal nga turista.
Matod ni Endab nga sagad sa mga turista nangaengganyo sa pagsuway sa canyoneering activity sa lungsod.
Sa Nobiyembre 1, gipahibaw sa Kagamhanan sa lungsod nga adunay bag-ong tourist package alang sa mga gustong mag canyoneering.
Anaa sa P2, 000 ang Badian Canyoneering Adventure, diin lakip na sa gibayran ang kaugalingong tour guides, gears, environmental fees, pagkaon, mainom ug energy pack.
Samtang P200 lang usab alang sa entrance fee niini sa mga dili mag canyoneering.
Lakip na niini ang tour guide, life vests ug gears ingon man ang environmental fee.
Ang Kawasan Falls subling nibukas sa Oktubre 26, 2023 human sa gihimo nga rehabilitasyon tungod sa kadaot nga naangkon niini tungod sa bagyo.