GIBALIK ang tanang kalihukan sa Kawasan Falls sa Lungsod sa Badian apil na ang canyoneering, niadtong Lunes, Hunyo 23, 2025, human kini temporaryong gisirado tungod sa lapukon ug delikado nga kahimtang sa tubig niadtong Dominggo, Hunyo 22.
Apan, sa silingang Lungsod sa Alegria, hangtod alas 11 sa buntag sa Hunyo 23, ang operasyon sa canyoneering wala pa mahatagi og pagtugot sa ilang Municipal Disaster Risk Reduction and Management Office (MDRRMO) tungod sa padayon nga safety assessments.
Ang kasamtangang pagsira usa ka pagpangandam sa kagamhanan sa duha ka lungsod, aron masiguro ang kaluwasan sa mga turista tungod sa padayon nga pag-uwan sa dapit.
Ang duha ka lungsod nakasinati og kasarangan ngadto sa kusog nga pagbunok sa uwan niadtong Sabado sa gabii, Hunyo 21, 2025.
Human sa pakisusi, ang Municipal Disaster Risk Reduction and Management Office (MDRRMO) sa Badian ug Alegria nakahukom nga temporaryong ihunong ang tanan nilang kalihukan.
Matod sa Philippine Atmospheric, Geophysical and Astronomical Services Administration (Pagasa) nga forecast, ang Visayas nakasinati og partly cloudy to cloudy skies nga may isolated rain showers o thunderstorms tungod sa localized thunderstorms niadtong Dominggo nga niresulta sa mas taas nga risgo sa tanang kalihukan.
Ang kahimtang sa Badian gipabalik human miarang-arang ang panahon sayo sa Lunes, nga nagtugot nga makapadayon pagbalik ang operasyon.
Samtang ang Alegria MDRRMO wala pa moisyu og notice sa pag-abli pagbalik ug ang canyoneering activities gihunong hangtod sa dugang pahibalo. / Julie Anne G. Sajetarios, HNU intern