KAWATAN nahigam sa pagpangawat og duha ka manok igtatari nadakpan og balik alas 5:00 sa kadlawon, Miyerkules Hulyo 30, 2025, sa Barangay Bulacao, Dakbayan sa Sugbo.
Narekuber ang manok nga mobalor sa P30,000.
Nasikop Si Ronnie Jemina, 39, ulitawo taga Sitio Punya, Barangay Duljo-Fatima, Dakbayan sa Sugbo.
Si Jemina gipaubos sa hospital arrest kay nalandig sa Cebu City Medical Center (CCMC) dihang gikulata sa mga istambay.
Kini iyang ikatulong pagpangawat sa maong dapit.
Si Police Master Sgt. Alfredo Macabudbud, Jr., imbestigador sa Inayawan Police Station, nibutyag nga matod sa caretaker sa manukan nga si Cielito Suerte, 46, nga nakabantay siya og mga kasikas.
Sa pagsusi niya, ang suspek daling nigawas nga nagdala og mga backpack nga maoy gisudlan sa mahalong manok igtatari.
Gigukod niya ug nagpaninggit og tabang nga dunay kawatan.
Daling nitabang ang mga tawo sa lugar sa paggukod sa suspek hangtod nadakpan kini ug nabawi ang duha ka manok igtatari, apan nabun-og siya kay gidumog sa mga estambay.
Nakita sa CCTV camera ang suspek nga siya maoy nangawat sa manok.
Gawas niini, siya sab ang gitumbok nga maoy responsable sa ubang kawat sa manok sa nahisgutang lugar.
Si Jemina nitug-an nga ibaligya niya sa tag P3,000 ang manok igtatari nga nagkantidad sa P15,000. / GPL