‘Kawatan’ gibunalan, napalgang patay

Balamban, Cebu.
Balamban, Cebu. Google Maps

Lalaking menor nga gi­ingong nabaniog nga kawatan napalgang patay nga dunay mga binunalan sa alas 7 sa buntag sa Biyernes, Dis­yembre 15, sa Sitio Buliring, Brgy. Abucayan, lungsod sa Balamban, tunga-tungang kasadpang Sugbo.

Ang biktima giila nga si John John Mahinay, gibana-bana nga 16-17 anyos, taga Sitio Immaculada, Barangay Nangka, Balamban.Ang biktima giila sa iyang apuhan alas 3 sa hapon sa samang adlaw. Kini human dunay mga nakaila niini tungod sa gisul-ob nga sweat shirt, color blue/gray ug naka-short pants nga color blue.

Si Police Lt. Col. Joey Bicoy, hepe sa Balamban Police Station nga nahinabi sa Superbaluta Cebu sa telepuno sa Biyernes, niingon nga dunay mga samad agi’g binunalan sa nawong ug ulo ang biktima.

Nagtuo sila nga ang biktima gibunalan og gahi nga butang kay way nakita’ng samad nga pinusilan sa bisan asang parti sa lawas.

Matod ni Bicoy ang biktima nailang kawatan sa ilang lugar base sa impormayon gikan sa apuhan ug mga silingan.

Ang apuhan nibutyag nga gipalayas niya ang biktima human nangawat kaniya og P60,000.

Dugang pa, nangawat sab kini og manok sa silingan niadtong Disyembre 7, 2023.

Gawas niini, daghan kini og record sa ilang barangay tu­ngod sa pagpangawat.

“Kawatan daw ni kaayo siyang bataa. Pwerting daghanang naglagot mao ning nilayas sa ilang lugar,” dugang ni Bicoy.

Wala hinuon nila isalikway ang posiblidad nga giunay sa mga kauban sanglit ang dapit diin siya napalgan kalibunan ug dunay mga botilya sa ilimnon.

Tungod niini, gitan-aw nila nga basin kauban ang nipatay samtang nag-backtracking sila sa dapit. Ang mga CCTV camera sa dalan paingon sa lugar ilang gisubay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph