‘Kawatan’ gituok sa bombero, patay

‘Kawatan’ gituok sa bombero, patay
SunStar Local News GPX

Suspetsado nga tulisan na­matay human gituok sa usa ka sakop sa Bureau of Fire Protection (BFP) dihang gisulod ang iyang balay, alas 2:20 sa kaadlawon sa Do­minggo, Pebrero 4, 2024, sa Sitio Sto. Niño, Barangay Inayagan, dakbayan sa Naga.

Si James Lowen Mayan, Jr., 20, ulitawo, taga Purok Punaw, Sitio Bacay, Barangay Tulay, lungsod sa Minglani­lla, nailhan sab sa alyas nga Christian Nuñez, namatay sa Mendiola General Hospital sa dakbayan sa Naga, alas 2:30 sa hapon sa Dominggo.

Samtang kasamtangang gi-custody sa Naga Police Station si FO1 Terencio Pinas Lape, 33, minyo, sakop sa BFP Cebu City sa sub-station sa Cebu Business Park.

Si FO1 Lape, nga nahinabi sa Superbalita Cebu, nagkana­yon nga iyaha na lang tubagon sa korte ang lakang sa kabanay sa suspek kon mosang-at og kaso.

Si Police Staff Sgt. Marga­rito Canceran, imbestigador sa Naga City Police Station nga nahinabi sa Superbalita Cebu sa Lunes, Pebrero 5, nagkanayon nga nakamata si Lape sa kasikas sa sulod sa ilang balay.

Iyang naabtan nga gikawat ni Mayan ang Acer notepad nga mobalor og P18,000.

Nasanta ang pagpangawat ni Mayan, kinsa dunay dala nga kutsilyo, nga nahigmata si Lape, busa giingong gi­su­­wayan og dunggab ang bombero.

Apan gipatiran niya si Mayan, kinsa naigo sa iyang tiyan ug nalabay ang kitchen knife nga dala niini.

Gipunit ni Mayan ang nalabay nga kutsilyo ug gihasmagan na usab dayon siya ni Lape busa nahitabo ang ilang nilayugay.

Gisipitan sa bukton ni Lape si Mayan apan gipaak siya sa naulahi sa kamot ug bukton.

Bisan pa niini, wa siya maka­buhi kay si Lape mas dako og lawas ug nalupig si Mayan hangtod naluya kini.

Dali niining gihiktan ni Lape ang tiil ug kamot ni Mayan aron dili makabuhi.

Sa pag-abot sa mga barangay tanod ug kapulisan, gidala sa tambalanan si Mayan.

Usa ka utility personnel sa ospital nakabati sa suspek nga nisulti nga tulo sila nga kauban sa pagpanulis.

Ang iyang duha ka mga kauban didto sa gawas kay siya lang misulod sa balay sa bombero.

Sumala sa usa ka utility worker, si Mayan naglisod na sab sa pag-estorya niadtong higayuna dihang naabot sa ospital.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph