Patay ang usa ka lalaki nga dunay pending warrant of arrest sa kaso sa ilegal nga drugas human nakigpinusilay sa mga polis ala 1:15 sa kaadlawon, Martes, Enero 21, 2025, sa Barangay Forta-liza, Lungsod sa Tuburan.
Ang napatay giila nga si Alfredo Batalona Bantay, Jr. nga naila usab sa ngalan nga Wilfredo Bantay, 31, residente sa Purok Butterfly, Barangay Babag, Dakbayan sa Lapu-Lapu.
Nakadawat og inpormasyon ang Tuburan Police Station nga nasigpatan si Bantay sa daplin sa karsada nga nagpaabot og masakyan nga bus.
Dali nga niresponde ang mga polis dala ang warrant of arrest nga giluwatan ni Judge Ruben Altubar ang Presiding Judge sa RTC Branch 29 sa Dakbayan sa Toledo pinetsahan niadtong Septiyembre 26, 2024, sa kalapasan sa Section 5, Article II, Republic Act 9165 ug walay gitugot nga piyansa.
Sa pag-abot sa mga polis, ila dayon ning gipahibawo nga aduna siyay warrant.
Sa dihang dakpon na unta, dali nga nikuot og armas si Bantay nga giluklok sa iyang hawak ug gipunting ngadto sa mga sakop sa tracker team sa Tuburan Police Station dayong kablit.
Maayo na lang nga wala makabuto hinungdan nga mikaratil og dagan, gisuwayan sa pag-neutralize sa mga polis ang maong suspek human nga wala gyud mopatuo nga motahan sa iyang kaugalingon hinungdan nga gipusil ug samdan sa iyang tiyan.
Dali kini nga gidala sa Andam Tuburan Emergency Responder sa Tuburan District Hospital aron matambalan ang samad, apan gideklarar siya nga dead on arrival ni Dr. Poebe Antiquina.
Gawas sa iyang warrant of arrest, siya usab ang gitumbok nga person of interest sa mga kaso sa kawat sa mga manok igtatari sa tibuok Lungsod sa Tuburan.
Niadtong Enero 10, 2025, sa alas 11 sa gabii, usa ka Ronan Mangubat Nuena, 36, taga Barangay Mangga sa maong lungsod ug tag-iya og farm ang nipahibawo sa kapulisan nga ang iyang tulo ka mahalon nga manok igtatari ang gikawat ug si Bantay ang gitumbok nga responsable.
Nakuha sa mga polis ang usa ka .38 nga revolver nga walay serial number ug duha ka bala.
Lakip sa nakuha ang upat ka manok nga sunoy kolor pula nga ang duha gisulod sa bayong. Ang tulo ka manok giila ni Nuena nga iyaha nga gikawat niadtong Enero 10. / AYB