Giilang notadong kawatan ang nadakpan sa gilusad nga buy-bust sa Parian Police Station 1 sa Cebu City Police Office sa Sitio Lumar, Barangay T. Padilla, Dakbayan sa Sugbo alas 9:40 sa gabii, Lunes, Marso 24, 2025.
Ang nadakpan giila nga si Raymund Ruiz alyas “Bunso” 27, taga Villagonzalo 2, Barangay Tejero.
Nakuhaan ang suspek og mga pinutos sa gituohang shabu nga motimbang og 5 gramos nga dunay balor nga P34,000.
Sa impormasyon sa kapulisan sa Parian nasayran nga notado na nga kawatan si Bunso ug moabot pa kini og pangawat sa Mandaue basta dunay maagian nga butang, iya kini nga kawaton.
Ang iyang kinawat iyang ibaligya ug ang halin mao usab ang iyang iangkat og shabu nga maoy iyang ibaligya sa iyang mga kustomer.
“Kini siya amo ni gitawag nga talented kay bisan unsa iyang makita nga makwartahan niya, iyang kawaton. Ang iyang kinawat iya sad na ibaligya ug ang halin iyaha sad ikompra sa shabu para baligya niya. Ang problema kay iya ra sad gamiton ang drugs unya inig kahurot mangawat na sad na siya,” matod sa usa ka polis.
Human ma-monitor ang ilegal nga kalihukan ni Bunso gilusad dayon ang buy-bust nga niresulta sa iyang pagkasikop.
Giangkon sa suspek nga mamaligya siya sa ilegal nga drugas tungod sa kawad-on.
Kalapasan sa Section 5 ug 11, Article II, Republic Act 9165 ang ipasaka sa kapulisan batok sa suspek. / AYB