Nagtingkagol karon sa bilanggoan sa kapulisan sa Siyudad sa Naga Sugbo human madakpi ang usa ka tulisan nga nilungkab sa usa ka balay sa Oceanside, Brgy. South Poblacion, Naga, Sugbo ug nakadala og assorted gold jewelries.
Ang suspek nga nadakpan giila sa kapulisan sa ngan lang nga 'Ken', 28, ulitawo ug taga Purok Talking 2, Brgy. South Poblacion, Naga.
Sumala sa imbestigasyon sa kapulisan sa Naga City ubos sa direktiba sa ilang hepe nga si P/Lt. Col. William Homoc, nailhan ang biktima nga si Jhon (di tinuod ngan), 33, ulitawo, ug nagpuyo sa naasoy nga dapit. Matod niini nga sa dihang niuli siya sa iyang balay sa alas 8:30 sa gabii, Dominggo, Septiyembre 15, 2024, iyang namatikdan nga ang iyang balay naukadyang na ug sa dihang iyang gisusi ang iyang kuwarto, nawagtang na ang iyang jewelry box nga gipatong sa iyang cabinet nga may sulod nga assorted gold jewelries nga nibalor og P300,000.
Subay sa nakuha sa CCTV camera, nasuta nga ang kawatan nakasud sa balay sa biktima pinaagi sa pagsaka agi sa terrace ug gilungkab ang trangka sa pultahan.
Nailhan usab sa pipila ka mga saksi ang suspek didto sa maong dapit hinungdan nga nadakpan sa hot pursuit sa kapulisan sa tambayanan niini sa ala una sa kaadlawon, Lunes, Septiyembre- 16, 2024 duol lang sa balay sa biktima.
Atol ning pagsuwat, wa pa ma-recover ang mga gold nga alahas./DVG