Kawatan nag-ala ‘ninja’ style sa paglungkab sa usa ka meat shop alas 6 sa buntag sa Lunes, Marso 25, 2024, sa Tabada Public Market sa N. Bacalso Ave., Brgy. Mambaling, dakbayan sa Sugbo.
Sa sinugdan, ang suspetsadong kawatan nga giila nga si Cyril Singson, 20, lumad nga taga Badian, habagatang Sugbo, apan kasamtangang nagpuyo, Sityo Guinabasan, Brgy. Basak San Nicolas, dakbayan sa Sugbo, wa mailhi.
Siya nag facemask apan nasuta pinaagi sa closed-circuit television (CCTV) nga dunay anime nga tattoo sa tuong kamot.
Pinaagi sa tattoo ug tsinelas, nailhan si Singson nga nasikop sa mga alas 3 sa Martes sa hapon.
Si Police Major Jonathan Beethoven Taneo, hepe sa Mambaling Police Station nga nahinabi sa Superbalita Cebu sa Martes, Marso 26, nibutyag nga nakatabang ang CCTV footage nga kuha sa Enzon Meat Shop sa ilang pag-ila sa suspek.
Nagtuo si Taneo nga dunay laing kauban ang suspek ug wala nila isalikway ang posibilidad nga kauban ra sila sa mga kawatan nga ningsulod sa usa ka laundry shop sa Mambaling.
Ang suspek nikatkat sa gate dayon nisaka sa atop gamit ang iyang gibitbit nga gunting.
Gigunting niini ang G.I. sheet o sin diin didto siya nilusot lahos sa comfort room dayon nideretso sa butcher area.
Giablihan ang employees locker ug gisul-ob ang uniporme.
Gibutyag ni Taneo nga nadala sa suspek ang cash nga P11,469 gikan sa drawer.
Gisuwayan pa unta niya pag-abli ang vault apan dali nga nidagan subay sa iyang giagian ug nisibat human nabantayan sa suspek nga usa sa mga emplayado niabli sa roll-up door.
“Kining kawatan nga ala Ninja atong gisubay kay naa may footage nakita iyang anime nga tattoo sa tuong kamot. Unya nakatsinelas ni nga ninjang kawatan. Abtik ug paspas kaayo nakakatkat,” dugang ni Taneo.
Tungod niini, iyang giawhag ang publiko ingon man mga tag-iya og establisemento nga siguraduhan nga nakandado ang ilang balay, tindahan o opisina. / GPL