‘Kawatan’ nasikop sa tagbalay

City of Naga (Google Maps)
City of Naga (Google Maps)

Usa ka suspetsadong kawatan nasikop dihang nasakpan sa akto sa tag-iya sa usa ka balay sa Purok Okra 2, Brgy. South Poblacion, dakbayan sa Naga, habagatang Sugbo alas 4 sa kaadlawon sa Biyernes, Marso 15, 2024.

Ang suspek giila nga si Kier Casals Avenido, 26, ulitawo, kinsa niingon nga siya taga Brgy. Suba, Siyudad sa Sugbo.

Sa imbestigasyon sa kapulisan sa Naga ubos sa kamandan ni Police Lt. Col. William Homoc, nasuta ang suspek nikatkat sa koral ug sayon nga nakasu’d sa balay kay nalimtan sa pag-lock ang pultahan.

Si Marvie Velarde, 46, dala­ga apan dunay kapuyo, nakamata tungod sa pagtubag sa sugo sa lawas ug nakurat dihang iyang naabtan ang suspek nga diha sa ilang sala.

Nakuha na ni Avenido ang iPhone 13 Promax nga mobalor og P70,000.

Si Velarde nisinggit ug nakamata ang iyang duha ka mga anak nga lalaki hinungdan nga ilang nasikop ang suspek.

Gikataho na way dala nga hinagiban ang suspek hinungdan nga sayon nga nasikop nila ni Velarde ug gi-turnover sa kapulisan.

Wa pa masayri ning pagsuwat kon pasakaan ba og kaso sa biktima ang suspek. (DVG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph