Sama sa natarantar ang usa ka wa mailhing kawatan nga nilungkab sa usa ka tindahan og cellphones ug accessories sa Diosdado Macapagal Highway sa Barangay Poblacion, Dakbayan sa Toledo, alas 2:16 sa kaadlawon, Huwbes, Oktubre 10, 2024,
Kini ang paghulagway ni Patrolman Jay Ryan Alatraca, ang investigator on case sa Toledo Police Station nga gikahinabi sa Superblaita Cebu human wa tanan makuha ang kuwarta sa kaha ug ang ubang kuwarta nga nagkatag diha sa salog, ug way nadala nga cellphone ug ubang accessories nga baligya.
Apan matod ni Alatraca, ang kawatan nakadala sa gibanabana nga P18,000 cash.
Sigon niya nga ang gilungkab mao ang Triple L Store sa nahisgutang dapit ug gipanag-iya sa usa ka 'Luz', 52, ug taga Poloyapoy, Brgy. Poblacion, Toledo. Dugang ni Alatraca nga sa iyang imbestigasyon ubos sa kamanduan sa ilang hepe nga si P/Lt. Col. Wilfredo Alarcon Jr., nasuta pinaagi sa na-record sa CCTV camera nga nahitabo ang maong pagpanglungkab sa alas 2:16 sa kaadlawon ug wa pa mailhi ang kawatan gumikan kay nagkawo ug nagmaskara kini gamit ang t-shirt.
Matod pa nga nakasulod ang suspetsado pinaagi sa pag-agi sa buho human gitangtang sa exhaust fan sa likod sa tindahan. Sumala sa kapulisan nga sa dihang siya nakasulod, gisakiyo ang maong cash apan sama sa nakuratan kini sa iyang pagdalidali.
Nagpadayon pa ang imbestigasyon sa kapulisan sa Toledo sa pag-ila sa nag-inusarang kawatan atol ning pagsuwat. / DVG