Gipasakaan na og kasong pagpangawat ang usa ka ex-convict nga nakuha sa CCTV camera niadtong Hulyo 22, sa usa ka convenience store nga nahimutang sa N. Bacalso Avenue,Barangay Duljo Fatima, Dakbayan sa Sugbo.
Sa gihimong follow up sa kapulisan sa Mambaling pinangulohan ni Police Captain Wilmer Castillo, nailhan ang maong kawatan nga si Daryl Ople, 27 anyos ug lumulupyo sa T. Padilla, Cebu City.
Una na nga nag-viral sa social media ang CCTV footage diin nakita ang pagpanguha ni Ople sa mga cellphone sud sa drawer sa maong tindahan hinungdan nga niimbistigar ang kapulisan.
Gikataho nga ang cashier sa maong tindahan nakatagpilaw niadtong higayona hinungdan nga nakakita og paagi nga mangawat si Ople.
Dihang nigawas na kini sa tindahan, wa kini masita sa guwardiya.
Nasayran usab nga maong kawatan nagsud gawas na sa bilangguan sa susamang kaso ingon man kalambigitan sa ilegal nga drugas.Padayong gipangita sa mga sakop sa Mambaling Police Station ang maong suspek. / JDG