Nadakpan na kadtong duha ka lalaki ug duha ka babaye nga nangawat og tulo ka box sa sigarilyo sa usa ka tindahan sa Lungsod sa Malabuyoc human sa gilusad nga manhunt sa mga sakop sa Criminal Investigation and Detection Group - Cebu Provincial Field Unit uban sa Toledo City Police Station ug Malabuyoc Municipal Police Station.
Nahitabo ang pagdakop alas 9:30 sa gabii, Biyernes, Hulyo 25, 2025 sa managlahing lugar sa Siyudad sa Sugbo.
Ang mga nadakpan giila nga silang Jimmy VillareƱa Risco, 62, lumad nga taga Barangay Lantad, Silay City, Negros Occidental; Rafael Magbanua Miasis, 38, lumad nga taga Barangay Mohon, Iloilo City; Noevie Gedorio Abilo, 38, lumad nga taga Barangay Mohon Santa Cruz, Iloilo City; ug Amy Ferrer Panisa, 53 lumad nga taga Barangay Lantad, Silay City, Negros Occidental apan kasamtangan nga nag-abang sa Barangay Basak San Nicolas, Dakbayan sa Sugbo.
Kahinumduman nga niadtong Hulyo 22, 2025 nag-viral ang video sa Facebook sa pagpangawat sa upat ka suspek sa usa ka convenience store sa Barangay PoblaciĆ³n 1 sa Malabuyoc nga nanguha og tulo ka box sa sigarilyo nga mokantidad ang tanan sa P240,000.
Dali nga ni-report sa kapulisan ang tag-iya sa tindahan nga si Dwight Kin Tecson aron mailhan ug madakpan ang nagkawat sa iyang paninda.
Tungod niini nihimo dayon og subsob nga imbestigasyon ang kapulisan sa Probinsya sa Sugbo sa pakig-alayon sa CIDG - Regional Field Unit 7.
Nasubay ang mga kuha sa CCTV camera atol sa gihimo nila nga back tracking ug nahibaw-an nga ang ilang gisakyan nga taxi - Toyota Innova Color Black nga dunay body number 1115.
Gipangsubay dayon sa CIDG 7 kung asa nakarehistro ang maong taxi unit ug ilang nasayran nga gipanag-iya kini sa OGRESS Taxi nga nahimutang ang opisina sa Jagobiao, Siyudad sa Mandaue.
Human makuha ang tanang kasayuran nakig-alayon dayon ang CIDG - Cebu Provincial Field Unit sa buhatan sa OGRESS Taxi ug ilang nahibaw-an kung kinsa ang nagmaneho nga positibo nga nitudlo sa mga suspek sa krimen nga ni-hire niya nga maoy sakyan.
Gilusad dayon ang pagpangita sa upat ubos sa Oplan OLEA (Other Law Enforcement Activities) ug malampuson sila nga nadakpan sa managlahing dapit sa Siyudad sa Sugbo. / AYB